बसन्त रुपाखेती
काठमाडौं । वाणिज्य बैंकहरुले धमाधम लाभांश घोषणा गरेका छन् ।
हाल सञ्चालनमा रहेका वाणिज्य बैंकमध्ये १५ वटाले लाभांश घोषणा गरेका छन् । बैंकहरुले आर्थिक वर्ष २०७७/०७८ को मुनाफाबाट लगानीकर्तालाई लाभांश घोषणा गरेका हुन् ।
हालसम्म बैंक भन्दा बढी लाभांश हिमालयन बैंकको रहेको छ । बैंकले लगानीकर्तालाई २६ प्रतिशत लाभांश प्रस्ताव गरेको छ । जसमध्ये २१.३८ प्रतिशत बोनस र ४.६२ प्रतिशत नगद लाभांश रहेको छ ।
बैंकहरुले प्रस्ताव गरेको लाभांशमध्ये सबैभन्दा कम कुमारी बैंकको रहेको छ । बैंकले जम्मा ८.६७ प्रतिशत लाभांश घोषणा गरेको छ । कुमारी बैंकले लगानीकर्तालाई ६ प्रतिशत बोनस र २.६७ प्रतिशत नगद लाभांश दिने भएको हो ।
लाभांश बढी दिने बैंकको दोस्रो स्थानमा रहेको सानिमा बैंकले १७.८९ प्रतिशत लाभांश प्रस्ताव गरेको छ । जसमा बोनस १७ र नगद ०.८९ प्रतिशत रहेको छ ।
यस्तै नेपाल बैंकले १७ प्रतिशत, नेपाल इन्भेष्टमेन्ट बैंक र सिटिजन्स बैंकले १६/१६ प्रतिशत, नेपाल बंगलादेश बैंकले १५.५ प्रतिशत, सिद्धार्थ बैंकले १५ प्रतिशत, माछापुच्छ्रे बैंकले १४ प्रतिशत, स्टयान्डर्ड चार्टर्ड बैंकले १३.०६, ग्लोबल आईएमई बैंक १३.५ प्रतिशत लाभांश दिने प्रस्ताव गरेको छ ।
त्यसैगरि एनआईसी एशिया बैंकले १५ प्रतिशत बोनस र ०.७९ प्रतिशत नगद गरि कुल १५.७९ प्रतिशत लाभांश घोषणा गरेको छ ।
यता एनएमबि बैंकले १२.५ प्रतिशत बोनस र ३.३ प्रतिशत नगद गरि कुल १६.८ प्रतिशत लाभांश दिने प्रस्ताव गरेको छ । एभरेष्ट बैंकले १०.३२ प्रतिशत र बैंक अफ काठमाण्डूले १४ प्रतिशत लाभांश प्रस्ताव गरेका छन् ।
प्रस्तावित लाभांश अब नेपाल राष्ट्र बैंकले स्वीकृत गरेर बैंकको आगामी साधारणसभाले पारित गरेपश्चात सेयरधनीहरुलाई वितरण हुनेछ ।
वि.सं.२०७८ कात्तिक १६ मंगलवार १६:५१ मा प्रकाशित