काठमाडौं । आदर्श लघुवित्त वित्तीय संस्थाले चालु आर्थिक वर्ष २०७८/७९ को पहिलो त्रैमासिक वित्तीय विवरण सार्वजनिक गरेको छ ।
बिहीबार प्रकाशित वित्तीय विवरण अनुसार कम्पनीले चालु आवको असोज मसान्तसम्म नाफामा सुधार देखिएको छ ।
उक्त अवधिमा कम्पनीले ६ लाख ६९ हजार रुपैयाँ नाफा गरेको छ । कम्पनीको नाफा गत वर्षको असोज मसान्तमा २९ लाख ५४ हजार रुपैयाँ नोक्सानीमा रहेको थियो ।
उक्त अवधिमा कम्पनीले ४७ लाख ६१ हजार रुपैयाँ खुद ब्याज आम्दानी गरेको छ । कम्पनीको खुद ब्याज आम्दानी गत वर्षको असोज मसान्तको तुलनामा ९४.२४ प्रतिशतले बढी हो । गत वर्षको सोही अवधिमा कम्पनीले २४ लाख ५१ हजार रुपैयाँ खुद ब्याज आम्दानी गरेको थियो ।
कम्पनीको चुक्ता पुँजी १ करोड ४० लाख रुपैयाँ रहेको छ । कम्पनीले जगेडा तथा कोषमा भने ७१ लाख ५२ हजार रुपैयाँ राखेको छ ।
चालु आवको असोज मसान्तमा कम्पनीको खराब कर्जा ह्वात्तै घटाएको छ । गत वर्षको असोज मसान्तमा ४.०६ प्रतिशत रहेको खराब कर्जा यस वर्षको सोही अवधिमा भने घटेर १.४२ प्रतिशत पुगेको छ ।
वि.सं.२०७८ कात्तिक २५ बिहीवार ११:४२ मा प्रकाशित