काठमाडौं । यूनियन हाइड्रोपावरले चालु आर्थिक वर्ष २०७८/७९ को पहिलो त्रैमासिक वित्तीइ विवरण सार्वजनिक गरेको छ ।
विवरण अनुसार चालु आवको असोज मसान्तसम्म कम्पनीले १ करोड ३३ लाख ८७ हजार रुपैयाँ नाफा कमाएको छ ।
जुन गत वर्षको सोही अवधिको तुलनामा ८५.६४ प्रतिशतले बढी हो । गत वर्षको पहिलो त्रैमासमा कम्पनीले ७२ लाख ११ हजार रुपैयाँ नाफा गरेको थियो ।
उक्त अवधिमा कम्पनीले विद्युत बिक्रीबाट २ करोड ७० लाख ९१ हजार रुपैयाँ आम्दानी गरेको छ । कम्पनीको विद्युत बिक्री आम्दानी गत वर्षको असोज मसान्तको तुलनामा ८.०३ प्रतिशतले बढी हो । गत वर्षको उक्त अवधिमा कम्पनीले २ करोड ५० लाख ७७ हजार रुपैयाँ आम्दानी गरेको थियो ।
उक्त अवधिमा कम्पनीको संचालन मुनाफा पनि वृद्धि भएको छ । गत वर्षको असोज मसान्तमा १ करोड ८९ लाख ५० हजार रुपैयाँ रहेको संचालन मुनाफाबाट यस वर्षको सोही अवधिमा भने २ करोड ३३ लाख ७९ हजार रुपैयाँ रहेको छ ।
कम्पनीको चुक्ता पुँजी ७५ करोड रुपैयाँ रहेको छ । कम्पनीको जगेडा तथा कोष भने ऋणात्मक देखिएको छ । चालु आवको असोज मसान्तसम्म कम्पनीको उक्त कोष ६ करोड २२ लाख ५१ हजार रुपैयाँ ऋणात्मक रहेको छ ।
कम्पनीको प्रतिसेयर आम्दानी १ रुपैयाँ ७९ पैसा र प्रतिसेयर नेटवर्थ ९१ रुपैयाँ ७० पैसा रहेको छ ।
वि.सं.२०७८ कात्तिक २८ आइतवार १२:४७ मा प्रकाशित