काठमाडौं । चालु आर्थिक वर्ष २०७८/७९ को तीन महिनामा कुल विदेशी विनिमय सञ्चिति ५.७ प्रतिशते घटेको छ ।
चालु आवको असार मसान्तमा १३९९ अर्ब २ करोड रुपैयाँ बराबर रहेको कुल विदेशी विनिमय सञ्चिति ५.७ प्रतिशतले कमी आएको हो । योसंगै असोज मसान्तमा १३१९ अर्ब ३२ करोड रुपैयाँ कायम भएको छ ।
अमेरिकी डलरमा यस्तो सञ्चिति यस वर्षको असार मसान्तमा ११ अर्ब ७५ करोड रहेकोमा असोज मसान्तमा ६.५ प्रतिशतले कमी आई १० अर्ब ९८ करोड कायम भएको छ ।
कुल विदेशी विनिमय सञ्चितिमध्ये नेपाल राष्ट्र बैंकमा रहेको सञ्चिति यस वर्षको असार मसान्तमा १२४४ अर्ब ६३ करोड रुपैयाँ रहेकोमा असोज मसान्तमा ८.० प्रतिशतले कमी आई ११४५ अर्ब २९ करोड रुपैयाँ कायम भएको छ ।
बैंक तथा वित्तीय संस्था (नेपाल राष्ट्र बैंकबाहेक) सँग रहेको विदेशी विनिमय सञ्चिति असार मसान्तमा १५४ अर्ब ३९ करोड रहेकोमा असोज मसान्तमा १२.७ प्रतिशतले वृद्धि भएको छ । योसंगै उक्त अवधिमा विदेशी विनिमय सञ्चिति १७४ अर्ब ३ करोड रुपैयाँ पुगेको छ ।
चालु आवको असोज मसान्तको कुल विदेशी विनिमय सञ्चितिमा भारतीय मुद्राको अंश २४.१ प्रतिशत रहेको छ ।
सञ्चिति पर्याप्तता सूचक आर्थिक वर्ष २०७८/७९ को तीन महिनाको आयातलाई आधार मान्दा बैकिङ्ग क्षेत्रसँग रहेको विदेशी विनिमय सञ्चिति ८.६ महिनाको वस्तु आयात र ७.८ महिनाको वस्तु तथा सेवा आयात धान्न पर्याप्त रहने देखिन्छ ।
चालु आवको असोज मसान्तमा विदेशी विनिमय सञ्चितिको कुल गार्हस्थ्य उत्पादन, कुल आयात र विस्तृत मुद्राप्रदायसँगका अनुपातहरु क्रमशः ३०.९ प्रतिशत, ६४.७ प्रतिशत र २५.१ प्रतिशत रहेका छन् । असार मसान्तमा यी अनुपातहरु क्रमशः ३२.८ प्रतिशत, ८४.७ प्रतिशत र २७.१ प्रतिशत रहेका थिए ।
वि.सं.२०७८ कात्तिक ३० मंगलवार १७:२८ मा प्रकाशित