काठमाडौं । नेपाल राष्ट्र बैंकले सेयर कर्जाको सिमा नहटाएपछि सेयर बजार आइतबार ठुृलो अंकले गिरावट आएको छ । मौद्रिक नीतिको पहिलो त्रैमासिक समिक्षापछिको पहिलो सेयर कारोबारको दिन बजार ८०.२९ अंकले ओरालो लागेर २६५१.४९ अंकमा अडिएको छ । नेपाल राष्ट्र बैंकले गत शुक्रबार मौद्रिक नीतिको पहिलो त्रैमासिक समिक्षा गरेका थिए ।
सो समिक्षा मार्फत सेयर बजारमा लागेको ४/१२ करोडको सिमा हट्ने आशामा लगानीकर्ताहरु थिए । तर सेयर बजार केही व्यक्तिको हातमा भएको जिकीर गर्दै गभर्नर महाप्रसाद अधिकारीले सो व्यवस्था परिवर्तन नगर्ने बताएपनि राष्ट्र बैंकका अन्य सन्चालहरु पनि चुप बसेका थिए ।
नेपाल राष्ट्र बैंकले साउन २९ गते मौद्रिक नीति जारी गर्दै एकाघरको परिवारले एक बैंकबाट बढीका ४ र विभिन्न बैंकबाट बढीमा १२ करोड रुपैयाँ भन बढी रकम बराबरको सेयर कर्जा लिन नपाउने व्यवस्था गरेको थियो । जसका कारण ओरालो लाग्न सुरु गरेको बजार निरन्तर रुपमा ओरालो लागिरहेको छ । विचमा केही समय उकालो लाग्न थालेपनि सो दिगो हुन सकेन ।
आइतबार सम्पुर्ण समुहगत परिसुचक पनि ओरालो लागेको नेपाल स्टक एक्सचेन्जले जनाएको छ । सवैभन्दा ओरालो लाग्नेमा जीवन बीमा कम्पनीहरुको परिसुचक रहेको छ । सो दिन यस समुहको ५३८.०३ अंकले ओरालो लागेको छ ।
त्यस्तै सय भन्दा बढी अंकले ओरालो लाग्ने समुहहरुमा उत्पादनमुलक, कारोबार,होटल एन्ड टुरिजम, बिकास बैंक, जलविद्युत कम्पनी, निर्जिवन बीमा कम्पनी र लघुवित्त कम्पनीको सेयरमुल्य रहेको छ । यसदिन दिनभर २३४ कम्पनीको ५ अर्ब ८३ करोड रुपैयाँ बराको सेयर कारोबार भएको छ ।
वि.सं.२०७८ मंसिर १२ आइतवार १५:२१ मा प्रकाशित
