काठमाडौ । प्रधानमन्त्री शेरबहादुर देउवाले अर्थतन्त्रको गुणात्मक वृद्धिका सरोकारवाला सवै पक्षको संयुक्त प्रयास अनिवार्य रहेको बताएका छन् । नेपाल आर्थिक पत्रकार समाज (सेजन)को २५औं वार्षिकोत्सवमा आयोजित कार्यक्रममा बोल्दै प्रधानमन्त्री देउवाले अर्थतन्त्रको गुणात्मक बृद्धिका लागि सरकार, निजी क्षेत्र र विदेशी विकास साझेदारहरुको सहयोग पनि उत्तिकै आवश्यक रहेको बताए ।
उनले पछिल्लो दुई बर्षमा नेपालको अर्थतन्त्रमा कोरोनाले नकारात्मक असर पारेको भन्दै उज्यालोले हामीलाई पर्खिरहेको पनि बताए । मूलुकमा दोस्रो चरणको आर्थिक सुधार आवश्यक रहेको भन्दै उनले पहिलो चरणको आर्थिक सुधार गर्दा निजी लगानीमा बृद्धि भएको र परिणामस्वरुप आर्थिक बृद्धिले पनि फड्को मारेको जानकारी दिएका थिए ।
‘पहिलो चरणको सुधारले नेपाललाई समृद्ध बनाउने बाटो देखाएको छ । दोस्रो चरणको सुधारले अर्थतन्त्रमा ठूलो बदलाव ल्याउनेछ । यसका लागि आवश्यक नीति, कानुन, रणनीति, योजना तथा संरचनाहरू निर्माणका लागि आवश्यक पूर्वाधारहरू निर्माण हुनेछन् ।’ उनले भने ।
उनले आर्थिक विकासको प्रबद्र्धन तथा लगानीको वातावरण बनाउनका लागि दक्ष आर्थिक पत्रकारहरुको महत्वपुर्ण योगदान रहने पनि दावी गरे । त्यस्तै उनले नेपालले लामो समयदेखि गरिव मुलुकको परिचयमा बस्न परेको तर स्तरोन्नतिको निर्णयले गरिव मानसिकताबाट मुक्ति पाउन ठूलो मद्धत मिल्ने बताए ।
उनले आगामी १० बर्षभित्र मध्यम आयस्तर भएको मुलुकमा स्तारोन्नती हुने १५ योजनाको दीर्घकालीन लक्ष्यपूर्तीमा केन्द्रित हुनुपर्ने बताए । त्यस्तै, विसं २१०० भित्रमा नेपाललाई समुन्नत राष्ट्रको स्तरमा पुर्याउने दीर्घकालीन सोच पनि मुलुकले बनाएको बताए ।
निजी क्षेत्र र अन्य सबै सरोकारवालाको संयुक्त प्रयासबाट मात्रै त्यो सम्भव छ । हामीले अघि बढाएको खुला बजारमुखी अर्थनीतिका कारण हासिल भएका उपलब्धि र यसमा देखिएका कमीकमजोरीको विश्लेषण गरेर समृद्धिको अगाडिको बाटो तय गर्नु हाम्रो प्राथमिकता हो ।
वि.सं.२०७८ मंसिर १५ बुधवार १५:२२ मा प्रकाशित
