काठमाडौं। जीवन बीमक संघमा आवद्ध जीवन बीमा कम्पनीहरुको वार्षिक सदस्यता शुल्कलाई २५ हजारबाट बृद्धि गरि १ लाख पुर्याउने प्रस्ताव साधारणसभाबाट पारित भएको छ ।
जीवन बीमा कम्पनीहरुको पेशागत हकहित लागि गठन भएको बीमक संघको दोस्रो वार्षिक साधारण सभा आज सम्पन्न भएको छ । संघले आज बसेरा बुटिक होटल, काठमाडौंंमा सभा आयोजना गरेको थियो ।
कार्यक्रममा प्रमुख अतिथिको रुपमा बीमा समितिका अध्यक्ष सूर्य प्रसाद सिलवाल र बिशेष अतिथिमा समितिका कार्यकारी निर्देशक राजुरमण पौडेलको उपस्थिती रहेको थियो ।
सभाले आर्थिक वर्ष २०७७–०७८ को वार्षिक प्रतिवेदन पारित गर्नुका साथै २०७८ आषाढ मसान्तसम्मको वासलात, नाफा नोक्सान हिसाब तथा नगद प्रवाह विवरण लगायतका वार्षिक वित्तीय विवरण उपर छलफल गरी पारित गरेको छ । सभामा २०७८–०७९ को लागि लेखापरीक्षकको नियुक्ति र निजको पारीश्रमिक निर्धारण गर्ने प्रस्ताव समेत पारित गरेको बींमक संघले बताएको छ।
सदस्यता शुल्क वृद्धि गरेर प्राप्त हुने रकमबाट जीवन बीमक संघले बीमा जनचेतना र अन्य अभिवृद्धि कार्यक्रममा लगाउने बींमक संघले जनाएको छ।
वि.सं.२०७८ पुस ४ आइतवार १८:१५ मा प्रकाशित
