काठमाडौं । दुई वाणिज्य बैंकसहित विभिन्न चार कम्पनीको लाभांश सुरक्षित गर्ने भोलि अर्थात मंगलबार अन्तिम दिन रहेको छ ।
उक्त दिन नेपाल एसबिआई बैंक, एनएमबि बैंक, छिमेक लघुवित्त र गणपति लघुवित्त वित्तीय संस्थाको लाभांश सुरक्षित गर्ने अन्तिम मौका रहेको छ ।
यी चारवटै कम्पनीहरुले साधारण सभा प्रयोजनका लागि पुस ७ गते बुक क्लोज गर्ने भएका छन् । योसंगै पुस ६ गते अर्थात मंगलबारसम्म कायम सेयरधनीहरुले सभामा भाग लिन र लाभांश प्राप्त गर्न सक्नेछन् ।
यी चारवटै कम्पनीहरुले गत आर्थिक वर्ष २०७७/७८को मुनाफाबाट प्रस्ताव गरेको लाभांश पारितका लागि वार्षिक साधारण सभा आव्हान गरिसकेका छन् ।
जसमध्ये नेपाल एसबिआई बैंकले सेयरधनीहरुलाई ३.५० प्रतिशत बोनस सेयर र कर प्रयोजनका लागि १.८१ प्रतिशत नगद लाभांश प्रस्ताव गरेको छ । उक्त प्रस्ताव पारित गर्न बंकले पुस २० गते २८औं वार्षिक साधारण सभा बोलाएको छ ।
त्यस्तै एनएमबि बैंकले गत आवको मुनाफबाट सेयरधनीहरुलाई १२.५० प्रतिशत बोनस सेयर र कर प्रयोजनका लागि ३.३० प्रतिशत नगद लाभांश वितरण गर्ने प्रस्ताव गरेको छ । उक्त प्रस्ताव पारित गर्न बैंकले पुस २२ गते बोलाएको छ ।
त्यसैगरि छिमेक लघुवित्त वित्तीय संस्थाले पनि २७ प्रतिशत बोनस सेयर र कर प्रयोजनका लागि ३ प्रतिशत नगद लाभांश वितरणको प्रस्ताव गरेको छ । उक्त प्रस्ताव पारितका लागि कम्पनीले पुस २३ गते सभा डाकेको छ ।
यता, गणपति लघुवित्तले गत आवको मुनाफाबाट सेयधरनीहरुलाई १९ प्रतिशत बोनस सेयर र कर प्रयोजनका लागि १ प्रतिशत नगद लाभांश वितरणको प्रस्ताव गरेको छ । उक्त सभा गर्ने भएको छ ।
वि.सं.२०७८ पुस ५ सोमवार १४:५८ मा प्रकाशित