काठमाडौ । नेपाल राष्ट्र बैंकले कर्जा निक्षेप, पुँजी अनुपात (सिसिडि) हटाएर कर्जा निक्षेप अनुपात (सिडि रेसियो) को व्यवस्था गरेकै कारण देशको वित्तिय बजारमा समस्या नआएको दावी गरेको छ ।
राष्ट्र बैंकले गत बुधबार पत्रकारसँग साक्षत्कार कार्यक्रममा केन्द्रिय बैंकले सिसिडि हटाएर सिडि रेसियोको व्यवस्था गरेकै कारण वित्तिय क्षेत्रमा ठूलो समस्या देखा नपरेको दावी गरेको हो ।
राष्ट्र बैंकका गभर्नर महाप्रसाद अधिकारीले राष्ट्र बैंकले सिडि रेसियोको व्यवस्था लिवरेज रेसियोलाई ठाउँमा राख्नका लागि गरिएको दावी गरे ।
उनले भने,‘राष्ट्र बैंकले बासेल थ्रि लागु गर्नुअघि लिवरेज रेसियो ९ गुणा मात्र बढी थियो तर वासेल थ्रि लागु गरेपछि १७ गुणा बढी भएको छ। सोही लिवरेज रेसियोलाई ठिक ठाउँमा ल्याउनका लागि सिडिको व्यवस्था गरेको हो ।’
त्यस्तै राष्ट्र बैंकका अनुसन्धान विभाग प्रमुख डा.प्रकाशकुमार श्रेष्ठले सिडि रेसियो लागु गरेका कारण बैंक तथा वित्तिय क्षेत्र संहालिएको दावी गरे ।
राष्ट्र बैंकले चालु आर्थिक बर्षको मौद्रिक नीति मार्फत सिसिडिको व्यवस्था हटाएर सिडि रेसियोको व्यवस्था लागु गरेको छ । सोही कारण बैंक तथा वित्तिय संस्थामा तरलताको अभाव भएको दावी गरिएसँगै बुधबार सोधिएको पत्रकार सम्मेलनमा डा.श्रेष्ठले सिडि रेसियोको व्यवस्थाका कारण बैंकहरु संहालिएको दावी गरेका हुन् ।
उनका अनुसार हाल बैंक तथा वित्तिय संस्थाको सिसिडि रेसियो ९१ प्रतिशत छ, तर सिडि रेसियो जम्मा ९२ प्रतिशतको हाराहारीमा छ जुन ९० प्रतिशतमा ल्याउनका लागि चालु आर्थिक बर्षको अन्तिमसम्मको समय दिइएको छ ।
राष्ट्र बैंकले सिडि रेसियोको व्यवस्था गरेका कारण बैंकहरुले कर्जा प्रबाहमा ध्यान दिदा जथाभावी रुपमा कर्जा प्रबाह नभएर वित्तिय क्षेत्र थप समस्याग्रस्त हुनबाट जोगिएको केन्द्रिय बैंकको तर्क छ ।
वि.सं.२०७८ पुस ८ बिहीवार १६:५९ मा प्रकाशित
