काठमाडौ । नेपाल इन्भेष्टमेन्ट बैंकसँग मर्जर विवादमा परेको हिमालयन बैंकले यही पुस ३० गते वार्षिक साधारणसभा डाकेको छ । बैंकले नेपाल इन्भेष्टमेन्ट बैंकलाई गाभ्ने एजेण्डा साधारणसभामा पेश गर्ने भएको छ ।
बैंकले गत आर्थिक बर्षमा नै इन्भेष्टमेन्ट बैंकसँग मर्ज गर्ने योजना बनाएपनि अध्यक्ष प्रचण्डमान श्रेष्ठका कारण मर्जरले लामो समय लिएको छ । गत मंसिरमा नै बैंकहरुले मर्जरका लागि लिएको समयसिमा सकिएका कारण नेपाल राष्ट्र बैंकमा समय थपका लागि पत्र पठाएका थिए । केन्द्रिय बैंकले जसरी पनि विग मर्जर गर्नैपर्ने भएका कारण समय थपिदिएको थियो ।
त्यसैले पनि बैंकले साधारणसभाबाट नेपाल इन्भेष्टमेन्ट बैंकसँग मर्ज गराउने एजेन्डा पारित गराउन लागेको हो । त्यस्तै बैंक सन्चालक समितिले गत वर्षको नाफाबाट ४.६२ प्रतिशत नगद लाभांस र २१.३८ प्रतिशत बोनस सेयर दिने निर्णय गरेको थियो । सो निर्णय पनि साधारणसभाले पारित गराउनुपर्ने छ ।
साधारणसभाले पारित गरेपनि नगद लाभांश भने तत्काल भुक्तानी नभएर नेपाल इन्भेष्टमेन्ट बैंकलाई गाभेर एकीकृत कारोबार गरेपछि मात्र हिमालयन बैंकका साविकका लगानीकर्ताले नगद लाभांस पाउने छन्। बोनस सेयर भने वितरण हुने छ। बोनस सेयरपछि चुक्ता पुँजी २ अर्ब २८ करोड रुपैयाँले बढ्ने छ। अहिले चुक्ता पुँजी १० अर्ब ६८ करोड रुपैयाँ पुग्ने छ।
बैंकले मर्जरका लागि अन्तिम सम्झौतापत्रमा हस्ताक्षर गर्ने अधिकार सञ्चालक समितिलाई दिइने एजेण्डा पनि लैजानेछ ।
वि.सं.२०७८ पुस ११ आइतवार ११:१३ मा प्रकाशित
