काठमाडौ । उद्योगी व्यवसायीहरुले विद्युतीय कर प्रणाली सरलीकृत गर्न सरकारलाई सुझाव दिएका छन् ।सोमबार आन्तरिक राजश्व विभाग तथा नेपाल उद्योग वाणिज्य संघ काठमाडौले संयुक्त रुपमा गरेको अन्तक्रिया कार्यक्रममा व्यवसायीहरुले करसँग सम्बन्धित अनलाइन सेवाहरु सरलीकरण गर्न सुझाव दिएका हुन ।
व्यवसायीहरुले आर्थिक ऐन २०७८ ले प्रदान गरेको छुट तथा सहुलियतहरु समेत व्यवसायीहरुले सहज रुपमा पाउन नसकेको गुनासो गर्दै कर प्रणालीका अनलाइन सेवाहरु चलाउन मुस्किल रहेको बताएका थिए ।
कार्यक्रममा नेपाल उद्योग वाणिज्य महासंघका उपाध्यक्ष दिनेश श्रेष्ठले अनलाईन पोटृलबारे साक्षरता अभियान सन्चालन गर्नुपर्ने अवस्था रहेको बताउँदै महासंघ र विभागबीच यस प्रकारको सहकार्य जरुरी रहेको पनि उनको दावी थियो ।
कार्यक्रममा आन्तरिक राजश्व विभागका महानिर्देशक शोभाकान्त पौड्यालले व्यवसायीहरुले उठाएका जिज्ञासाहरु माथी प्रकाश पार्दै समस्या समाधान गर्ने प्रतिवद्धता जनाए । अन्तरक्रियामा नेपाल उद्योग वाणिज्य संघ काठमाण्डौका पदाधिकारीहरु, कार्यसमिति सदस्यहरु , राजश्व सामितिका सदस्यहरु तथा विभिन्न विषयगत समितिका सदस्यहरू तथा अन्य वस्तुगत संघ संस्थाका प्रतिनिधिहरूको सहभागिता रहेको थियो।
वि.सं.२०७८ पुस १२ सोमवार १७:०१ मा प्रकाशित