काठमाडौं । प्राइम लाइफ इन्स्योरेन्स कम्पनीले नक्कली कर्मचारी बनाई भक्ता बुझेको पुष्टि भएको छ । कम्पनीले फर्जी कर्मचारी बनाई मार्फत तलब भत्ता बुझेको पाईएपछि बीमा समितिले यस बिषयमा ७ दिन भित्र स्पष्टिकरण पेश गर्न निर्देशन दिएको हो ।
प्राइम लाइफले ३३ जना नक्कली कर्मचारी खडा गरी उनिहरुको नाममा ४ करोड ३५ लाख रुपैयाँ भुक्तानी लिएको पाईएको छ । करारमा कर्मचारी नियुक्त गराईएको तर कार्यलयमा एकदिन पनि हाजिर भने गराईएको छैन । यसरी कागजी कर्मचारी खडा गरि रकम निकासा गरेको विषय एक सञ्चार माध्यम मार्फत सार्वजनिक भए पछि बीमा समितिले छानविन सुरु गरेको थियो ।
छानविनका क्रममा कम्पनीले उक्त रकम निकासा गरेको पाइएको हो । बीमा समितिका कार्यकारी निर्देशक राजुरमण पौडेलको संयोजकत्वमा उक्त छानविन भएको थियो ।
कम्पनीले ३३ जना नक्कली कर्मचारी खडा गरी उनिहरुको नाममा उक्त रकम निकासा गरेको छ । वैदेशिक रोजगार बीमालेखको कमिशन दिनका लागि खडा गरिएका कर्मचारी मार्फत यो रकम निकासा भएको छानविन समितिका एक सदस्यले बताए ।
बीमा समितिले चार वर्ष पहिले वैदेशिक रोगजार बीमालेखको कमिशन घटाएपछि अभिकर्ताको कमिशनलाई यथास्थितिमा नै राख्न कम्पनीले नक्कली कर्मचारी खडा गरि उक्त रकम निकासा गरेको थियो ।
वि.सं.२०७८ पुस १२ सोमवार १७:४१ मा प्रकाशित
