काठमाडौं । नेपाल विद्युत प्राधिकरणले काठमाडौ उपत्यकामा विद्युतको माग बढ्दा पछिल्लो समयमा विद्युत आप्रबाहमा कठिनाइ भएको स्पष्टीकरण दिएको छ । पछिल्लो समयमा काठमाडौ उपत्यकामा समय समयमा बत्ति जाने समस्या हुदा उपभोक्ताहरु हैरानीमा परेका थिए भने सामाजिक सञ्जालमा नेपाल विद्युत प्राधिकरणका कार्यकारी निर्देशक कुलमान घिसिङ विरुद्ध व्यापक आक्रोश पोखिएको छ ।
ग्राहकहरुले दुख पाउनुका साथै आफ्नो विरुद्ध सामाजिक सञ्जालमा नकारात्मक टिप्पणी उठ्न थालेपछि प्राधिकरणका कार्यकारी निर्देशक घिसिङले शुक्रबार पत्रकार सम्मेलन नै गरेर स्पष्टीकरण दिएका हुन् ।
उनले जाडोयाम सुरु भएसँगै उपत्यकामा हिटर, एसी र इन्डक्सन चुल्लोको प्रयोग बढ्दा विद्युतको मागमा दोव्वरले बृद्धि भएका कारण विभिन्न ठाउँमा करिव ५० वटा ट्रान्सफरमर विग्रिएकोले अहिलेको समस्या उत्पन्न भएको दावी गरे । हाल काठमाडौ उपत्यकामा मात्र दैनिक ५०० मेगावाट विजुलीको माग छ । सामान्य अवस्थामा यहाँको विजुलीको माग प्रतिदिन २५० देखि ३०० मेगावाट हो । देशभर भने १३०० मेगावाटबाट १७०० मेगावाट पुगेको छ ।
‘पछिल्लो दुई दिन पानी पर्यो विग्रिएको ट्रान्सफरमर बनाउन जाने समुहको व्यवस्थापन गर्न पनि कठिनाइ भएकोले समस्या आएको हो अव त्यस्तो समस्या आउदैन । ‘उनले भने ।
उनका अनुसार उपत्यकामा ३८०० सय वटा ट्रान्सफरमरहरु सन्चालनमा रहेका छन् । महाराजगञ्ज, दरवारमार्ग लगायतका केही मुख्य स्थानका ट्रान्सफरमर विग्रिएकोले समस्या भएको हो ।
घिसिङले यो समस्या केही दिनमा नै व्यवस्थापन हुने दावी गर्दै दिर्घकालिन रुपमा पनि प्राधिकरणले समस्याको समाधान गर्नका लागि कदम चालेको पनि स्पष्टीकरण दिए ।
‘विद्युतको मागमा आएको बृद्धि खुसीको कुरा हो, हामीलाई अहिलेको लोड धान्छ जस्तो लागेको थियो धान्न सकेन जसका कारण समस्या पैदा भयो त्यसैले हामीले समस्या समाधानका लागि नयाँ ट्रान्सफरमर किनेर रिप्लेस गर्दैछौ भने कतिपय स्थानमा फिडर नै विग्रिएकोले बनाउदैछौ ।’उनले भने ।
वि.सं.२०७८ पुस १६ शुक्रवार १५:२५ मा प्रकाशित