काठमाडौं । हिमालयन बैंकले सेयरधनीहरुलाई डिम्याट खाता नम्बर/सेयर परिचय नम्बर खुलाई वार्षिक साधारण सभामा उपस्थित हुन अनुरोध गरेको छ ।
एक सूचना निकाल्दै बैंकले २९औं वार्षिक साधारण सभामा फर्म/कम्पनीका तर्फबाट उपस्थित हुने संस्थापक/साधारण सेयरधनीहरुले डिम्याट खाता नम्बर/सेयर परिचय नम्बर खुलाई आफ्नो कम्पनीको आधिकारिक पत्र मार्फत अख्तियारी लिई उपस्थित हुन अुनरोध गरेको हो ।
बैंकले आउँदो पुस ३० गते वार्षिक साधारण सभा डाकेको छ । सभामा बैंकले नेपाल इन्भेष्टमेन्ट बैंकलाई गाभ्ने एजेण्डा पेश गर्ने भएको छ ।
बैंकले गत आर्थिक बर्षमा नै इन्भेष्टमेन्ट बैंकसँग मर्ज गर्ने योजना बनाएपनि अध्यक्ष प्रचण्डमान श्रेष्ठका कारण मर्जरले लामो समय लिएको छ ।
गत मंसिरमा नै बैंकहरुले मर्जरका लागि लिएको समयसिमा सकिएका कारण नेपाल राष्ट्र बैंकमा समय थपका लागि पत्र पठाएका थिए । केन्द्रिय बैंकले जसरी पनि विग मर्जर गर्नैपर्ने भएका कारण समय थपिदिएको थियो ।
त्यसैले पनि बैंकले साधारणसभाबाट नेपाल इन्भेष्टमेन्ट बैंकसँग मर्ज गराउने एजेन्डा पारित गराउन लागेको हो ।
यस्तै सभामा बैंकले गत आर्थिक वर्षको मुनाफाबाट सेयरधनीहरुलाई २१.३८ प्रतिशत बोनस सेयर र ४.६२ प्रतिशत नगद लाभांश वितरणको प्रस्ताव पातिर गर्नेछ ।
बोनस सेयरपछि चुक्ता पुँजी २ अर्ब २८ करोड रुपैयाँले बढेर १० अर्ब ६८ करोड पुग्ने छ ।बैंकले मर्जरका लागि अन्तिम सम्झौतापत्रमा हस्ताक्षर गर्ने अधिकार सञ्चालक समितिलाई दिइने एजेण्डा पनि लैजानेछ ।
सभा प्रयोजनका लागि बैंकले पुस ११ गतेदेखि ३० गतेसम्म बुक क्लोज गर्ने जनाएको छ ।
वि.सं.२०७८ पुस २५ आइतवार ११:३६ मा प्रकाशित