काठमाडौं । भोलि अर्थात सोमबार तीन कम्पनीहरुले साधारण सभा डाकेका छन् । भोलि दुई जलविद्युत र एक लघुवित्त कम्पनीको साधारण सभा हुँदैछ ।
सोमबार बुटवल पावर कम्पनी, रसुवागढी हाइड्रोपावर कम्पनी र एनएमबि लघुवित्त वित्तीय संस्थाले साधारण सभा गर्न लागेका हुन् । सभामा कम्पनीहरुले लाभांश वितरण लगायतका एजेण्डाहरुमा छलफल गरि पारित गर्नेछन् ।
सोमबार बुटवल पावरको २९औं वार्षिक साधारण सभा हुने भएको छ । सभामा लाभांश पारित गर्ने मुख्य एजेण्डा रहेको छ ।
सभाले गत आर्थिक वर्ष २०७७/७८वको मुनाफाबाट सेयरधनीलाई १० प्रतिशत बोनस सेयर र १० प्रतिशत नगद लाभांश वितरण गर्ने प्रस्ताव पारित गर्नेछ ।
कम्पनीले सभा प्रयोजनको लागि बुक क्लोज पुस ११ गते देखि २६ गतेसम्म बन्द गरेको छ । पुस ८ गतेसम्म कायम सेयरधनीले साधारण सभामा भाग लिन र लाभांश पाउनेछन् ।
यस्तै, रसुवागढी हाइड्रोपावरले पनि सोमबार सभा गर्दै छ । कम्पनीको सभाले आव २०७७/७८ को वार्षिक प्रतिवेदन छलफल गरी पारित गर्नेछ ।
यसका साथै आव २०७८/७९ को लागि लेखापरिक्षकको नियुक्ती र निजको पारिश्रमिक निर्धारण गर्ने प्रस्ताव पारित गर्नेछ ।
यसका साथै सभाले कम्पनीको चुक्तापूँजी र सञ्चित मुनाफाको जम्मा रकमभन्दा बढी हुनेगरी ऋण लिने निर्णय अनुमोदन तथा थप ऋण लिन स्वीकृती प्रदान गर्ने प्रस्ताव पनि पारित गर्नेछ ।
त्यसैगरी एनएमबि लघुवित्त वित्तीय संस्थाले नवौं वार्षिक साधारण सभा सोमवार हुँदैछ । सभामा लाभांश पारित गर्ने मुख्य एजेण्डा रहेको छ ।
कम्पनीको सभाले २१.५० प्रतिशत बोनस सेयर र कर प्रयोजनका लागि १.१३ प्रतिशत नगद लाभांश वितरण गर्ने प्रस्ताव पारित गर्नेछ ।
कम्पनीले साधारण सभा प्रयोजनको लागि पुस ९ गते देखि २६ गतेसम्म बुक क्लोज भएको छ । पुस ८ गतेसम्म कायम सेयरधनीले सभामा भाग लिन र लाभांश पाउनेछन् ।
वि.सं.२०७८ पुस २५ आइतवार १७:१० मा प्रकाशित
