काठमाडौं । सरकारले सन्चालनमा ल्याएको १० प्रकारका सहुलियतपुर्ण कर्जाका स्कीममध्ये दुईवटा मात्र सफल भएका छन् । व्यवसायिक कृषि कर्जा र महिला उद्यमशील कर्जा बाहेक बाँकी ८ प्रकारका सहुलियतपुर्ण कर्जाको स्कीम असफल भएका छन् ।
नेपाल राष्ट्र बैंकका अनुसार हालसम्म सहुलियतपुर्ण कर्जाको नाममा १ लाख ३६ हजार ७१३ जनाले २ खर्ब ११ अर्ब ८ करोड १२ लाख एक हजार रुपैयाँ बराबरको सहुलियतपुर्ण कर्जा लिएका छन् ।
सो रकम बराबरको कर्जाको लागि सरकारले ११ अर्ब १५ करोड ८० लाख ६ हजार रुपैयाँ बराबरको व्याज अनुदान दिएको पनि राष्ट्र बैंकले उल्लेख गरेको छ ।
नेपाल राष्ट्र बैंकका अनुसार सफल मानिएको स्कीममध्ये व्यवसायिक कृषि तथा पशुपंक्षी कर्जा अन्तर्गत मंसिर मसान्तसम्ममा ५५ हजार ७५७ जनाले १ खर्ब ३३ अर्ब १८ करोड रुपैयाँ सहुलियतपुर्ण ऋण लिएका छन् । भने महिला उद्यमशिल कर्जा ७८ हजार २०० जनाले ७४ अर्ब २४ करोड ८८ लाख ६० हजार रुपैयाँ लिएका छन् ।
त्यस्तै शिक्षित युवा स्वरोजगार कर्जा १५० जनाले ६ करोड ३७ लाख ८८ हजार रुपैयाँ कर्जा प्रबाह भएको छ भने विदेशबाट फर्केका युवा परियोजना कर्जा ९५४ जनाले ६४ करोड ७१ लाख ६ हजार रुपैयाँ कर्जा प्रबाह भएको छ ।
त्यस्तै दलित समुदाय व्यवसाय विकास कर्जा १०९४ जनाले ६३ करोड ६० लाख २३ हजार, उच्च र प्राविधिक तथा व्यवसायिक शिक्षा कर्जा १४२ जनाले ३ करोड ३७ लाख ८२ हजार , भुकम्प पिडितहरुको निजी आवास निर्माण कर्जा २२० ले ४ करोड २१ लाख ६१ हजार रुपैयाँ बराबरको कर्जा लिएका छन् ।
कपडा उद्योग सन्चालनको लागि १७४ ले २ अर्ब २१ करोड ३० लाख ४९ हजार, प्राविधिक तथा व्यवसायिकक तालमि परिषद्बाट मान्यताप्राप्त संस्थाबाट दिइने तालिम २ जनाले ३ लाख १६ हजार र युवा स्वरोजगार कर्जा २० जनाले ७७ लाख ७९ हजार रुपैयाँ कर्जा लिएका छन् ।
‘सहुलियतपुर्ण कर्जाका लागि व्याज अनुदान सम्बन्धी एकीकृत कार्यविधि, २०७५’ अनुसार सरकारले महिला उद्यमशिल कर्जाको लागि ६ प्रतिशत र अन्य स्कीमका सहुलियतपुर्ण कर्जाको लागि ५ प्रतिशत व्याज अनुदान पाइन्छ ।
वि.सं.२०७८ माघ ४ मंगलवार १६:४५ मा प्रकाशित
