काठमाडौं । सेयर बजारमा भारी अंकको गिरावट आएको छ । साताको दोस्रो कारोबार दिन बजार १००.१० अंकले घटेको हो ।
सोमबार बजार परिसुचक पनि २८२०.४१ अंकको बिन्दुमा पुगेर बन्द भएको छ । उक्त दिन सबै समूहहरु राताम्मे बनेका छन् ।
लगानीकर्ताहरु नाफा बुक गर्नेमा हाबी देखिएको र चुनाव सर्ने हल्लाले सेयर बजारमा करेक्सन भएको नेपाल इन्भेष्टर फोरमका अध्यक्ष तुलसीराम ढकाल बताउँछन् । उनि भन्छन् “बजार अहिले घट्नुपर्ने कारण केही छैन, यो घटेको भन्दा पनि करेक्सन भएको हो । २२ सयको बजार २९ सयमा आउँदा लगानीकर्ता नाफा बुक गर्नेमा हाबी भएकाले बजार घटेको हो । साथै चुनाव सर्ने हल्लाको कारण पनि बजार घटेको हुनसक्छ तर चुनाव पाँच/छ महिना अघि पछि हुँदैमा बजारमा प्रभाव पर्दैन बजाले पुनः गति लिन्छ ।
उक्त दिन कारोबार रकम भने वृद्धि भएको छ । आज ८ अर्ब ८८ करोड ८५ लाख १३ हजार रुपैयाँ बराबरको १ करोड ७० लाख ६३ हजार ८३३ कित्ता सेयर खरिदबिक्री भएको हो ।
उक्त दिन अपि पावरको सर्वाधिक सेयर कारोबार भएको छ । आज कम्पनीको ३८ करोड ३४ लाख २४ हजार रुपैयाँ बराबरको सेयर कारोबार भएको हो ।
कारोबार रकमकै आधारमा दोस्रो स्थनामा रहेको एनआईसी एशिया बैंकको ३६ करोड ७३ लाख ६४ हजार रुपैयाँ बराबरको सेयर खरिदबिक्री भएको हो ।
यस्तै, आज अरुण भ्याली हाइड्रोपावरको ३० करोड ४९ लाख ६६ हजार रुपैयाँ बराबरको सेयर खरिदबिक्री भएको छ ।
वि.सं.२०७८ माघ १० सोमवार १५:२५ मा प्रकाशित
