काठमाडौँ । माघको पहिलो साता बाणिज्य बैंकहरुबाट १३ अर्ब रुपैयाँ गायव भएको छ । बाणिज्य बैंकहरुको छाता संगठन नेपाल बैंकर्स संघको तथ्यांक अनुसार गत साता बाणिज्य बैंकहरुबाट १३ अर्ब रुपैयाँ निक्षेप घटेको छ ।
पुसमा महिनामा ८७ अर्ब रुपैयाँ निक्षेप संकलन हुदा अव विस्तारै तरलता अभाव हट्न थालेको बैंकरहरुलाई भान भएको थियो तर एक हप्तामा नै एक्कासी १३ अर्ब रुपैयाँ निक्षेप बाहिरिएपछि भने उनीहरु समेत अचम्ममा परेका छन् ।
संघको तथ्यांक अनुसार पुस मसान्तसम्म बैंकहरुसँग ४३ खर्ब २४ अर्ब रुपैयाँ निक्षेप रहेको थियो तर माघको पहिलो साता १३ अर्ब रुपैयाँ निक्षेप बाहिरिएर ४३ खर्ब ११ अर्ब रुपैयाँ रहेको छ ।
त्यस्तै विदेशी मुद्राको निक्षेप भने ४ अर्ब रुपैयाँले बढेर १ खर्ब १ अर्ब रुपैयाँ पुगेको छ । निक्षेप घटेपनि एक सातामा बाणिज्य बैंकहरुले १ अर्ब रुपैयाँ कर्जा प्रबाह गरेका छन् । निक्षेप बढ्न नसकेपछि पुनः तरलताको समस्याले च्याप्ने देखेर नै बैंकहरुले कर्जा लगानीमा कन्जुस्याई गरिरहेका हुन् ।
नेपाल राष्ट्र बैंकले पुस देखि लागु हुनेगरी विभिन्न २० वटा विलासिताका सामग्रीमा नगद मार्जिन राख्ने व्यवस्था गरेका कारण पनि माघको पहिलो हप्तामा नै निक्षेपमा कमी आएको बैंकरहरु बताउँछन् ।
नगद मार्जिन राख्नुपर्ने भएपछि विलासीताका सामग्री आयात गर्ने व्यापारीहरुले निक्षेप झिकेर लगेकोले पनि निक्षेप घटेको उनीहरुको तर्क छ ।
वि.सं.२०७८ माघ ११ मंगलवार १५:५९ मा प्रकाशित