काठमाडौं । जानकी फाइनान्स कम्पनीले चालु आर्थिक वर्ष २०७८/७९ को दोस्रो त्रैमासिक वित्तीय विवरण सार्वजनिक गरेको छ ।
बिहीबार सार्वजनिक वित्तीय विवरण अनुसार उक्त अवधिमा कम्पनीको नाफा उल्लेखीय सुधार गरेको छ ।
गत वर्षको पुस मसान्तमा ३ करोड ३० लाख ४५ हजार रुपैयाँ नोक्सानीमा रहेको कम्पनीले यस वर्षको सोही अवधिसम्म आईपुग्दा भने ३ करोड ५५ लाख ८९ हजार रुपैयाँ नाफा कमाएको छ ।
उक्त अवधिमा कम्पनीले ९ करोड ५१ लाख ७४ हजार रुपैयाँ खुद ब्याज आम्दानी गरेको छ । यो आम्दानी गत वर्षको पुस मसान्तसम्मको तुलनामा भने ६५.२९ प्रतिशतले बढी हो । गत वर्षको सोही अवधिमा कम्पनीको खुद ब्याज आम्दानी ५ करोड ७५ लाख ७७ हजार रुपैयाँ रहेको थियो ।
चालु आवको दोस्रो त्रैमाससम्ममा कम्पनीको खुद संचालन मुनाफा भने ७ करोड ४६ लाख ९८ हजार रुपैयाँ रहेको छ । गत वर्षको सोही अवधिमा कम्पनीको यो मुनाफा १ करोड ७८ लाख ५९ हजार रुपैयाँ नोक्सानीमा रहेको थियो ।
कम्पनीको चुक्ता पुँजी ६० करोड ४ लाख ११ हजार रुपैयाँ रहेको छ । कम्पनीले जगेडा कोषमा भने २० करोड ५४ लाख ९४ हजार रुपैयाँ राखेको छ ।
उक्त अवधिमा कम्पनीले खराब कर्जा पनि घटाएको छ । गत वर्षको पुस मसान्तसम्ममा ७.९३ प्रतिशत रहेको खराब कर्जा यस वर्षको सोही अवधिमा ५.३१ प्रतिशतमा झारेको छ ।
कम्पनीको प्रतिसेयर आम्दानी ११ रुपैयाँ ८५ पैसा र प्रतिसेयर नेटवर्थ १६६ रुपैयाँ ७१ पैसा रहेको छ ।
वि.सं.२०७८ माघ १३ बिहीवार १२:३७ मा प्रकाशित
