काठमाडौं । साञ्जेन जलविद्युत कम्पनीले चालु आर्थिक वर्ष २०७८/७९ को दोस्रो त्रैमासिक वित्तीय विवरण सार्वजनिक गरेको छ ।
चालु आवको दोस्रो त्रैमासमा कम्पनी १ करोड ४८ लाख ३५ हजार रुपैयाँ नोक्सानीमा रहेको छ । कम्पनी गत वर्षको पुस मसान्तसम्मको तुलनामा नोक्सानी झनै बढेको हो । गत वर्षको सोही अवधिमा कम्पनी १ करोड ३४ लाख ४८ हजार रुपैयाँ नोक्सानीमा रहेको थियो ।
कम्पनीले निर्माण गरिरहेको १४.८ मेगावाट क्षमताको माथिल्लो सान्जेन र ४२.५ मेगावाट क्षमताको सान्जेन जलविद्युत् आयोजना निर्माणको अन्तिम चरणमा रहेको छ । आयोजनाहरु निर्माणको चरण्मा रहेको हुदाँ विद्युत बिक्री आम्दानी नरहेको कम्पनीले जनाएको छ ।
कम्पनीको कर्जा तथा सापटी रकम भने २०.३८ प्रतिशत बढेर ५ अर्ब ५२ करोड ४६ लाख २४ हजार रुपैयाँ पुगेको छ । गत वर्षको पुस मसान्तसम्ममा कम्पनीको कर्जा सापटी ४ अर्ब ५८ करोड ९३ लाख ९८ हजार रुपैयाँ रहेको थियो ।
कम्पनीको चुक्ता पुँजी ३ अर्ब २८ करोड ५० लाख रुपैयाँ रहेको छ । कम्पनीको जगेडा कोष भने १८ करोड २८ लाख ७९ हजार रुपैयाँ ऋणात्मक देखिएको छ ।
कम्पनीको प्रतिसेयर आम्दानी ९० पैसा ऋणात्मक र प्रतिसेयर नेटवर्थ ९४ रुपैयाँ ४३ पैसा रहेको छ ।
वि.सं.२०७८ माघ २८ शुक्रवार १४:२६ मा प्रकाशित
