काठमाडौँ । जाल्पा सामुदायिक लघुवित्त वित्तीय संस्था लिमिटेडको आईपिओ आज बाँडफाँड हुने भएको छ ।
कम्पनीले माघ २१ गते, शुक्रबारदेखि माघ २५ गते, मंगलबारसम्म सर्वसाधारणका लागि निष्कासन गरेको आईपीओको प्रि–अलटमेन्ट शुक्रबार सम्पन्न भएसँगै आज बाँडफाँड हुने भएको हो ।
क्यापिटलका अनुसार उक्त आईपीओको बाँडफाँड आज टाइम स्क्वायर रेष्टुरेन्ट, बालुवाटार, काठमाडौँमा दिउँसो ४ बजे गरिनेछ ।
संस्थाले प्रतिकित्ता १०० रुपैयाँ अंकित दरमा ५ लाख २२ हजार कित्ता आईपीओ निष्कासन तथा बिक्री खुल्ला गरेको थियो । जसमध्ये चुक्ता पूँजीको ०.५ प्रतिशत अर्थात ८ हजार कित्ता संस्थाका कर्मचारीहरुका लागि र ५ प्रतिशत अर्थात २६ हजार १०० कित्ता म्युचुअल फण्डका लागि छुट्ट्याइएको छ । बाँकी रहेको ४ लाख ८७ हजार ९०० कित्तामा सर्वसाधारणहरूले आवेदन दिन पाउँथे ।
उक्त आईपिओमा परेको आवेदनले नयाँ रेकर्ड कायम गरेको थियो । अन्तिम दिनसम्ममा २६ लाख ५९ हजार ५४० जनाले ३ करोड २५ लाख २० हजार ५८० कित्ताका लागि आवेदन दिएका छन् । यो सर्वसाधारणका लागि माग गरिएको भन्दा ६६.६५ गुणा धेरै हो । मागभन्दा धेरै आवेदन परेको हुनाले आईपीओ गोलाप्रथाबाट बाँडफाँड गरिनेछ ।
वि.सं.२०७८ फागुन १ आइतवार १२:५० मा प्रकाशित