काठमाडौं । अर्थमन्त्री जनादर्न शर्माले सहकारीहरुको व्याजदर बढाउन अस्वीकार गरेका छन् । सोमबार राष्ट्रिय सहकारी महासंघ र राष्ट्रिय सहकारी बैंकको संयुक्त टोलीले अर्थमन्त्रीलाई भेटेर बैंक तथा वित्तिय संस्थाहरुले व्याजदर बढाएका कारण बजारमा दवाव भएकोले सहकारीको पनि सन्दर्भ व्याजदर बढाउनुपर्ने माग राखेका थिए ।
प्रतिक्रियामा अर्थमन्त्री शर्माले व्याजदर बढाउने विषयमा आफ्नो सहमति नरहेको स्पष्ट पारे । “म बैंक तथा वित्तीय संस्थाहरुले बढाएको व्याजदर घटाउनुपर्छ भन्ने पक्षमा छु” अर्थमन्त्रीलाई उदृत गर्दै महासंघका अध्यक्ष कडेँलले भने, “सहकारीको पनि व्याज बढाउनुपर्छ भन्ने मागमा सहमत हुन सक्दिन ।”
भूमि व्यवस्था, सहकारी तथा गरिवी निवारण मन्त्री शशी श्रेष्ठले सन्दर्भ व्याजदर बढाउनका लागि अर्थमन्त्री समेत सहमत हुनुपर्ने संकेत गरेपछि महासंघ अर्थमन्त्रीलाई भेट्न सोमबार अर्थमन्त्रालय पुगेको थियो ।
सोमबार नै विभागीय मन्त्री शशी श्रेष्ठलाई महासंघले भेटेको थियो । त्यस्तै मंगलबार महासंघको टोलीले नवनियुक्त रजिष्टार रुद्र प्रसाद पण्डितसँग समेत छलफल गर्ने तालिका रहेको जनाएको छ ।
सन्दर्भ व्याजदर पुनरावलोकन गर्न पुस पहिलो साता नै सन्दर्भ व्याजदर समितिको बैठक राखिएको थियो । उक्त बैठकमा महासंघले सन्दर्भ ब्याजदर १७ प्रतिशत पुर्याउन प्रस्ताव गरेको थियो । तर पहिलो पटक बैठक गरेपछि सन्दर्भ व्याजदरको बैठक पुनः बस्न सकेको छैन ।
वि.सं.२०७८ फागुन २ सोमवार १७:२८ मा प्रकाशित
