काठमाडौं । फागुन महिनामा विभिन्न ६ कम्पनीहरुले वार्षिक साधारण सभाका लागि मिति तय गरेका छन् ।
हालसम्म तीन वटा बीमा, दुई जलविद्युत र एक फाइनानस कम्पनीले फागुन महिनामा वार्षिक साधराण सभाका लागि मिति तोकेका हुन् ।
जसमध्ये ज्योति लाइफ इन्स्योरेन्स, अजोड इन्स्योरेन्स, लाइफ इन्स्योरेन्स कर्पोरशेन नेपाल र जानकी फाइनान्स, युनाइटेड मोदी हाइड्रोपावर र नेशनल हाइड्रोपावर कम्पनीले सभा आव्हान गरेका छन् ।
कम्पनीहरुको सभाले लाभांश पारित गर्ने मुख्य एजेण्डा रहेको छ । तीन कम्पनीहरुले सेयरधनीलाई लाभांश दिने भएका छन भने अजोड इन्स्योरेन्सका लगानीकर्ताको हात खाली हुने भएको छ ।
ज्योति लाइफ इन्स्योरेन्स र अजोड इन्स्योरेन्स कम्पनीले आउँदो फागुन ६ गते वार्षिक साधारण सभा गर्ने भएका छन् ।
उक्त दिन हुने ज्योति लाईफको वार्षिक साधारण सभामा लाभांश पारित गर्ने मुख्य एजेण्डा रहेको छ । कम्पनीले आव २०७६/७७ को मुनाफाबाट सेयरधनीहरुलाई १०.५२ प्रतिशत लाभांश दिने प्रस्ताव गरेको छ । जसमध्ये १० प्रतिशत बोनस सेयर र कर प्रयोजनका लागि ०.५२६३ प्रतिशत नगद लाभांश दिने भएको हो । सभा प्रयोजनका लागि कम्पनीले माघ २४ गते बुक क्लोज गरेको छ ।
सोही दिन (फागुन ६ गते) हुने अजोड इन्स्योरेन्सले भने लगानीकर्ता लाभांश वितरणको प्रस्ताव गरेको छैन ।
तर, कम्पनीको सभाले सञ्चालक समितिको तर्फबाट अध्यक्षद्वारा आर्थिक वर्ष २०७७÷७८ को वार्षिक प्रतिवेदनबारे छलफल गरी पारित गर्ने, आव २०७७÷७८ को लेखापरीक्षण प्रतिवेदन, वासलात, नाफा नोक्सान हिसाब र सोहि अवधिको नगद प्रवाह विवरण लगायतका वित्तिय विवरणहरू छलफल गरी पारित गर्नेछ ।
कम्पनीले सभाले आव २०७८÷७९ को लागि लेखापरीक्षक नियुक्ति गरी पारिश्रमिक पनि तोकिनेछ । साधारण सभा प्रयोजनार्थ कम्पनीले माघ २४ गते बुक क्लोज गरेको छ ।
यस्तै, लाइफ इन्स्योरेन्स कर्पोरशेन नेपालले भने आउँदो फागुन ११ गते वार्षिक साधारण सभा गर्ने भएको छ ।
सभाले आव २०७६/७७ को मुनाफाबाट सेयरधनीहरुलाई २१ प्रतिशत लाभांश वितरणको प्रस्ताव पारित गर्नेछ ।
कम्पनीले सेयरधनीहरुलाई २० प्रतिशत बोनस सेयर र कर प्रयोजनका लागि १ प्रतिशत नगद लाभांश दिने भएको हो । सभा प्रयोजनका लागि कम्पनीले माघ २४ गते बुक क्लोज गर्ने भएको छ ।
त्यसैगरि फागुन ७ गते जानकी फाइनान्स कम्पनीले २५औं वार्षिक साधारण सभा गर्ने भएको छ । कम्पनीको सभाले लाभांश पारित गर्ने मुख्य एजेण्डा रहेको छ ।
कम्पनीले आव २०७७/७८ को मुनाफाबाट सेयरधनीहरुलाई १५ प्रतिशत बोनस सेयर र कर प्रयोजनका लागि ०.८७९५ प्रतिशत नगद लाभांश दिने प्रस्ताव गरेको छ ।
सभा प्रयोजनका लागि कम्पनीले माघ २६ गतेदेखि ६ गतेसम्म बुक क्लोज गर्ने भएको छ ।
यस्तै, आउँदो फागुन २६ गते युनाइटेड मोदी हाइड्रोपावरले वार्षिक साधारण सभा गर्ने भएको । कम्पनीको फागुन १ गतेको सञ्चालक समितिको बैठकले उक्त दिन सभा गर्ने निर्णय गरेको हो ।
सभाले गत आर्थिक वर्ष २०७७/७८ सम्मको वार्षिक प्रतिवेदन सहितका वित्तीय विवरणहरु पारित गर्नुका साथै चालू आवको लागि लेखापरीक्षक नियुक्ती र निजको पारिश्रमिक समेत निर्धारण गर्नेछ ।
साथै सर्वसाधारण शेयरधनीहरुबाट एक महिला सहित दुई जना सञ्चालक निर्वाचन गर्ने कार्यक्रम समेत सभाका लागि तय भएको छ ।
साधारण सभा प्रयोजनका लागि कम्पनीले फागुन ५ गते (एक दिन) बुक क्लोज गर्ने भएको छ ।
त्यसैगरि नेशनल हाइड्रोपावरले लाभांश र हकप्रद प्रस्तावसहित आउँदो फागुन ३० गतेका लागि वार्षिक साधारण सभा आह्वान गरेको हो ।
सभाले आव २०७७/७८ को खुद मुनाफाबाट हाल कायाम चुक्ता पुँजीको १८.५२५ प्रतिशत बोनस सेयर र कर प्रयोजनको लागि ०.९७५ प्रतिशत नगद लाभांश वितरण गर्ने प्रस्ताव गरेको छ ।
त्यस्तै कम्पनीले लाभांश वितरणपछि कायम हुने चुक्ता पुँजीको ५० प्रतिशत हकप्रद निष्काशन गर्ने प्रस्ताव गरेको छ । सभामा नेशनल हाइड्रोले सुनकोशी हाइड्रोलाई गाभ्ने प्रस्ताव पनि पेश हुने छ ।
सुनकोशी हाइड्रोका १०० कित्ता हुने सेयरधनीलाई नेशनल हाइड्रोको २५ कित्ता सेयर दिने गरि नेशनल हाइड्रोले सुनकोशी हाइड्रोलाई १ः०.२५ को स्वापमा गाभ्न लागेको हो ।
कम्पनीले साधारणसभाको लागि फागुन १३ गते बुक क्लोज गर्ने निर्णय गरेको छ । फागुन १२ गतेसम्म कायम सेयरधनीले मात्र सभामा भाग लिन तथा प्रस्तावित लाभांश पाउन सक्ने छन् ।
वि.सं.२०७८ फागुन ३ मंगलवार ०७:४६ मा प्रकाशित
