काठमाडौं । बीमा अभिकर्ता तथा बीमा सर्भेयरको वार्षिक नविकरण अनलाईबाटै गर्न सकिने भएको छ ।
चैत पहिलो सातादेखि अभिकर्ता तथा सर्भेयरले अनलाइन नविकरणको सुविधा पाउने भएका हुन् ।
बीमा अभिकर्ता तथा सर्भेयरको नविकरण पद्दती तथा लाइसेन्स लिने प्रकृयाँलाई छिटोछरितो बनाउनका लागि अनलाइन प्रणाली व्यावस्था गरिएको बीमा समितिले जनाएको छ ।
समितिका प्रवक्ता राजुरमण पौडेलका अनुसार अभिकर्ताले बीमा समितिको अनलाइन प्रणालीबाट सजिलै नविकरण गर्नुका साथै अनलाइन प्रणालीबाटै नविकरण शुल्क भुक्तानी गर्न सक्ने भएका छन् । यो सँगै बैशाख पहिलो सातादेखि अनलाइन प्रणालीबाटै अभिकर्ताले नयाँ लाइसेन्स पाउने छन् ।
अभिकर्ताको नविकरण तथा लाइसेन्स लिने प्रणालीमा हुने झण्झलाई समेत अनलाईन प्रणालीले सहजिकरण गर्ने उनको भनाई छ । हाल कम्पनी आफैले एउटा कोड बनाउने र सोहि कोड मार्फत बीमा पोलिसी बिक्री गर्ने व्यवस्था छ । नियम अनुसार अभिकर्ता तथा सर्भेयरको लाइसेन्स दिने तथा नविकरण गर्ने प्रमुख जिम्मेवारी बीमा समितिको हुन्छ ।
सुरुमा कम्पनी आफैले कोड दिने र केहि समय पछि मात्रै त्यो कोडलाई बीमा समितिबाट स्वीकृत गराउदा अभिकर्ताकै आधिकारिकता प्रति प्रश्न उठेपछि यसलाई पुर्ण रुपमा अनलाइन बनाउन लागिएको हो । अव अनलाइनबाटै अभिकर्ताले कोड लिने र नविकरणको सुविधा लिने छन् ।
बीमा सर्भेयर तथा अभिकर्ताले हरेक चैत महिना भित्रमा वार्षिक नविकरण गर्नुपर्ने हुन्छ । यदि नविकरण भएको छैन भने उक्त अभिकर्ताले पोलिसी बिक्री गर्न मिल्दैन ।
यहि असहजतालाई मध्यनजर गर्दै बीमा समितिले स्वचालित अनलाइन प्रणालीको विकास गरिरहेको छ । जसमा अभिकर्ताले बीमा समितिको वेवसाइट मार्फत नविकरण गर्नुका साथै आवस्यक शुल्क पनि भुक्तानी गर्न पाउने छन् । पहिलो चरणमा चैत पहिलो सातादेखि नविकरणको सुविधा उपलब्ध गराइने भएको छ । दोस्रो चरणमा बैशाख पहिलो सातादेखि बीमा समितिको वेवसाइटबाटै लाइसेन्सका लागि आवेदन दिन पाइनेछ ।
हाल बीमा कम्पनी आफैले लाइसेन्स दिदै आएकोमा बैशाख पहिलो सातादेखि बीमा समितिको वेवसाइटबाट आवेदन दिन सकिनेछ । यसका लागि सबैभन्दा पहिला बीमा कम्पनीले सम्बन्धित व्यक्तिलाई अभिकर्ताको तालिम दिनेछ । कम्पनीले उक्त अभिकर्तालाई तालिम दिएको विवरण अनलाइन प्रणालीमा प्रविष्ट गर्नेछ । सोहि समयमा अभिकर्ताले अनलाइन प्रणालीबाट आवेदन दिने छ । आवेदन दिदा बीमा कम्पनीले दिएको र थप प्रमाणपत्र अपलोड गर्नुपर्ने छ ।
बीमा समितिले अभिकर्ताले दिएको निवेदन र बीमा कम्पनीले उपलब्ध गराएको विवरणलाई हेरेर अभिकर्ताको लाइसेन्सका दिने छ । यस्तो लाइसेन्स पिडिएफ मार्फत सुरक्षित साथ आफैले प्रिन्ट गर्न सक्ने छन् ।
वि.सं.२०७८ फागुन ३ मंगलवार ११:५४ मा प्रकाशित