काठमाडौं । नेपाल धितोपत्र बोर्डको लागि सोमबार सिफारिस समितिले तीन जनाको नाम सिफारिस गरेँसँगै बोर्डका कायम मुकायमको जिम्वेवारी पाएका निरज गिरी चौथोपटक पनि रेसबाट बाहिरिएका छन् ।
गिरीलाई पहिलो पटक २०६८मा धितोपत्र बोर्डमा अध्यक्षको लागि सिफारिस गरिएको थियो । तत्कालिन समयमा नेकपा माओवादीको तर्फबाट डा. बाबुराम भट्टराई प्रधानमन्त्री थिए । उनकी पत्नी हिसिला यामीको तजविजमा बोर्डका अध्यक्षमा गिरीको नाम सिफारिस भएपनि माओवादी निकट बाबुराम श्रेष्ठ अध्यक्ष बने ।
त्यसपछि नेपाली कांग्रेसका नेता शुशील कोइराला प्रधानमन्त्री हुदा तत्कालिन अर्थमन्त्री डा.रामशरण महत थिए उनकै तजविजमा बोर्डको अध्यक्ष नियुक्त गरियो । नेपाली कांग्रेसको पालामा पनि गिरीको नाम सिफारिसमा परेको थियो तर सो समयमा पनि डा.महतले हस्तक्षेप गरी आफु निकट डा.रेवत बहादुर कार्कीलाई नियुक्त गरे ।
त्यस्तै २०७६ मा पनि तत्कालिन अर्थमन्त्री डा.युवराज खतिवडा अर्थमन्त्री थिए । प्रधानमन्त्रीको रुपमा केपी ओली भएपनि अर्थमन्त्रालयको मातहतका कार्यालयहरुमा को राख्नेभन्ने निर्णय डा.खतिवडाको चल्नेगरेको थियो ।
त्यसैले डा.खतिवडाले आफूलाई राष्ट्र बैंकमा रहदा सहयोग गरेका भिष्म ढुंगानालाई अध्यक्षको जिम्वेवारी दिए । सो समयमा पनि संस्थाबाट एकजना बरिष्ठ कर्मचारीको नाम सिफारिस गर्नै पर्ने भएकोले गिरी सिफारिसमा परेका थिए ।
ढुंगानाले स्वार्थ बाझिनेगरी काम गरेको समाचारहरु बाहिरिएपछि उनलाई बोर्डबाट २० महिनामा नै सरकारले निलम्बन गर्यो । त्यसपछि बोर्डको अध्यक्षको प्रतिस्पर्धा पुनः सुरु भएर नियुक्तिका लागि अन्तिम तयारी भइरहदा यो पालिपनि गिरीलाई अध्यक्षको लागि सिफारिस गरिएको थियो । तर प्रधानमन्त्री पत्नी डा.आरजु राणा देउवा हावी हुदा उनी अन्तिम चरणमा रेसबाट बाहिरिए ।
एक उच्च स्रोतका अनुसार गिरीले समितिका संयोजक राष्ट्रिय योजना आयोगका उपाध्यक्ष डा.विश्व पौडेलसँगको भेटबाट नै थाहापाइ सकेका थिए, उनी बोर्डको अध्यक्ष बन्दैनन् र रमेश हमाललाई दिइदै छ भन्ने ।
चुनावको समय आएको र धेरै रकम चाहिने भएकोले डा. आरजु राणाले मोटो रकम लिएर डा. हमाललाई अध्यक्ष बनाउने पक्का पक्की भइसकेको उच्च स्रोतले बताए । बोर्डको अध्यक्षका लागि मोटो रकमको लेनदेन गर्न विचौलियाहरु सक्रिय भइरहेका छन् ।
नयाँ स्टक एक्सचेन्ज र ब्रोकर लाइसेन्स दिनेकुरामा सहमति भएपछि हमाललाई अध्यक्ष दिने सहमति भएको पाइएको छ । धितोपत्र बोर्डका अनुसार हालसम्म चारवटा कम्पनीहरुले नयाँ स्टक एक्सचेन्ज खोल्नका लागि बोर्डमा आवेदन दिएका छन् ।
विभिन्न बीमा तथा फाइनान्स कम्पनीहरुको लगानी रहेको हिमालयन स्टक एक्सचेन्ज, आइएमई र पभु ग्रुपको लगानी रहेको काठमाडौ स्टक एक्सचेन्ज, विशाल ग्रुप सहित मारवाडीहरुको लगानी रहेको नेशनल स्टक एक्सचेन्ज र बाणिज्य बैंकहरुको लगानी रहेको सेक्युरिटिज एन्ड डेरिभेटिज एक्सचेन्जले नयाँ स्टक एक्सचेन्जका लागि आवेदन दिएका छन् ।
तर ति कम्पनीहरु भन्दा बाहिरबाट नयाँ कम्पनीका लागि आवेदन दिने र नयाँलाई नै लाइसेन्स दिनेगरी बोर्डमा छलफल भइरहेको छ । बोर्डको अध्यक्षको सिफारिसमा परेकै समयमा समेत करोडौ लगानी गर्नका लागि व्यापारी व्यवसायीहरु सिफारिस भएका व्यक्तिहरुको घरघर धाएका थिए ।
डा.हमाल एनआरएन हुन् । उनी यसअघि थाइल्यान्डमा रियलस्टेट व्यवसाय गर्ने गर्दथे । उनले अध्यक्ष हुनका लागि आरजुका विश्वास पात्र डा.विश्व पौडेल मार्फत लविङ गरेको पाइएको छ । साथै उनले अध्यक्षका लागि मोटो रकम बुझाएको पनि चर्चा हुन थालेको छ ।
वि.सं.२०७८ फागुन ३ मंगलवार १३:२० मा प्रकाशित
