काठमाडौं । भोलि अर्थात सोमबार टाटा मोटर्सको बहुप्रतिक्षित इलेक्ट्रिक कार टिगोरको नेपालमा औपचारिक लन्च हुने भएको छ ।
नेपालका लागि आधिकारिक वितरक सिप्रदी ट्रेडिङले उक्त कार केही साताअघि नेपाल भित्रिएको थियो । टिगोर टाटा मोटर्सको नेपाल भित्रिने नेक्सपछिको दोस्रो इलेक्ट्रिक कार हो । लन्च भएपछि यसको औपचारिक बुकिङसमेत खुल्ला हुने कम्पनीले जनाएको छ ।
टिगोर इभीमा टाटाले १७२ एमएमको ग्राउन्ड क्लियरेन्स दिएको छ । टिगोर इभीमा ड्राइभ र स्पोर्ट गरी दुई ड्राइभिङ मोड उपलब्ध रहेको छ । यस गाडीमा भएको ब्याट्रीमा ८ वर्ष वा एक लाख ६० हजार किलोमिटरसम्मको वारेन्टी रहेको छ ।
टाटा टिगोर इभीको मूल्य नेपाली बजारमा भेरियन्ट अनुसार फरक– फरक छ । जसमा सबैभन्दा सस्तो भनिएको एक्स ई मोडेलको मूल्य २९ लाख ९९ हजार, एक्स एमको ३१ लाख ४९ हजार र एक्सजेड प्लस भेरियन्टको ३२ लाख ९९ हजार रुपैयाँ तोकिएको छ ।
टिगोर इभीले ग्लोबल एनक्याप क्र्यास टेष्टमा फोर स्टार रेटिङ पाएको छ । यो सेडान कारमा २६ किलोवाट आवरको लिथियम आयोन ब्याट्री र ५५ किलोवाट क्षमताको इलेक्ट्रीक मोटर जडान गरिएको कम्पनीले जनाएको छ ।
यसमा रहेको ब्याट्रीलाई २५ किलोवाटको डिसी चार्जरबाट चार्ज गर्दा ६५ मिनेटमा ८० प्रतिशतले चार्ज हुन्छ । यो गाडी फुल चार्ज हुँदा ३०६ किलोमिटरसम्मको माइलेज दिने कम्पनीले जनाएको छ । यसमा ७ इन्चको हर्मन इन्फोटेनमेन्ट सिस्टम, अटोमेटिक क्लाइमेट कन्ट्रोल, डिजिटल एलसीडी क्लष्टर, अटो एसी, सिट उचाई मिलाउन मिल्ने ड्राइभर सिट लगायतका विशेषता रहेको कम्पनीले बताएको छ । गाडीमा स्मार्ट की पुस–बटन स्टार्ट, पोर्टेबल चार्जिङ केबल पनि पाउन सकिन्छ।
चालक र यात्रु सहजताको लागि टिगोरमा ३० भन्दा बढी कनेक्टिभिटीका विशेषताहरु छन्, जसमध्ये रिमोट कमान्ड र रिमोट डाइगोनिस्टिक पनि पर्छन् । सुरक्षाको हिसाबले हेर्दा कम्पनीले यो टिगोर ईभीमा डुअल एयर ब्याग, इबीडीसहितको एबीएस, रियर पार्किङ सेन्सर, रियर पार्किङ क्यामेरा, सिट बेल्ट रिमाइन्डर जस्ता विशेषताहरु समावेश गरेको छ ।
वि.सं.२०७८ फागुन ८ आइतवार १८:१० मा प्रकाशित