काठमाडौं । नेपाल विद्युत प्राधिकरणले पनि साधारण सेयर (आइपीओ) जारी गर्ने भएको छ । पुर्ण सरकारी स्वामित्वमा रहेको प्राधिकरणले आगामी पाँच बर्षे रणनीति अन्तर्गत साधारण सेयर जारी गर्न लागेको हो ।
प्राधिकरणले ठूला परियोजना संचालन गरिरहेको छ । त्यसका लागि कम्तीमा पनि ५० अर्ब रकम लगानी आवश्यक पर्ने भएकोले आइपीओ जारी गर्ने भएको हो । आइपीओ जारीका लागि प्राधिकरणले रेटिङ पनि गराइसकेको छ । इक्रा नेपालले गरेको रेटिङ अनुसार प्राधिकरणले डवल ए प्लस रेटिङ पाएको छ । यसको मतलव प्राधिकरणको अवस्था ठिक छ र लगानी गर्न सुरक्षित पनि रहेको छ, भन्ने हो ।
इक्रा नेपालले जारी गरेको विज्ञप्ति अनुसार डवल ए प्लस रेटिङ प्राप्त कम्पनीले सेयर जारी गर्दा कम्पनीको उधारो वा कर्जाको जोखिम ज्यादै न्यून हुन्छ भन्ने हो । विद्युत प्रशारण पूर्वाधार निर्माणको लागी ठूलो लगानी आवश्यक भएको र प्राधिकरणको वित्तीय दायीत्व पुरा गर्नको लागी समेत थप पूँजी परिचालन गर्नुपर्ने भएको हुँदा प्राधिकरणले पुँजी जुटाउनका लागि आइपीओ जारी गर्न लागेको हो ।
प्राधिकरणको कार्यकारी निर्देशक कुलमान घिसिङले प्राधिकरणको घाटा कम गर्नका लागि आइपीओ जारी गर्ने घोषणा गरेका थिए । पहिलो कार्यकालमा नै सो घोषणा गरेपनि सोही अनुसार काम अगाडी बढ्न नसक्दा आइपीओ जारी हुन सकेन ।
प्राधिकरणले प्रिमियम मूल्यमा आइपीओ जारी गर्ने तयारी गरिरहेको छ । १ खर्ब ६४ अर्ब चुक्ता पूँजी रहेको विद्युत प्राधिकरणले गत आर्थिक बर्षमा ८ अर्ब रुपैयाँ नाफा कमाएको थियो ।
वि.सं.२०७८ फागुन १२ बिहीवार १४:४६ मा प्रकाशित
