काठमाडौं । चालु आर्थिक वर्ष २०७८/७९ को ७ महिनाको अवधिमा सवा ५ अर्ब बढीको स्याउ, सुन्तला आयात भएको छ ।
भन्सार विभागले हालै सार्वजनिक गरेको तथ्याङ्कअनुसार चालु आवको माघ मसान्तसम्ममा ५ अर्ब १७ करोड ३८ लाख ८६ हजार रुपैयाँ बराबरको स्याउ, सुन्तला नेपाल भित्रिएको हो ।
चालु आवको ७ महिनाको अवधिमा विश्वका विभिन्न मुलुकहरुबाट ७० हजार १५१ टन स्याउ, सुन्तला आयात भएको हो । स्याउ, सुन्तला आयातबाट सरकारले ४९ करोड ५ लाख ७४ हजार रुपैयाँ राजश्व प्राप्त गरेको छ ।
चालु आवको माघ मसान्तसम्ममा ४ अर्ब ३७ करोड ८२ लाख ७२ हजार रुपैयाँ बराबरको ताजा स्याउ नेपाल भित्रिएको हो । नेपालमा छिमेकी दुई मुलुक भारत, चीन, टर्की, गिनी विसाउ देशबाट स्याउ आयात भएको हो । नेपाली बजारमा चिनिया स्याउको बर्चस्व देखिएको छ । चालु आवको ७ महिनामा उक्त देशबाट ३ अर्ब २२ करोड २२ लाख ३० हजार रुपैयाँ बराबरको स्याउ आयात भएको छ ।
उक्त अवधिमा भारतबाट १ अर्ब १५ करोड ३२ लाख ५६ हजार, टर्कीबाट २६ लाख २५ हजार र गिनी विसाउबाट १ लाख ६१ हजार रुपैयाँ बराबरको स्याउ नेपाल भित्रिएको हो ।
यस्तै, विभागको तथ्याङ्क अनुसार माघ मसान्तसम्ममा ७९ करोड ५६ लाख १४ हजार रुपैयाँ बराबरको सुन्तला नेपाल भित्रिएको छ । नेपालमा चालु आवको ७ महिनामा १४ हजार ५७० टन सुन्तला आयात भएको हो ।
नेपालमा भारत, इजिप्ट र साउथ अफ्रिकाबाट सुन्तला आयात भएको छ । सुन्तला आयातबाट नेपाल सरकारले ७ करोड २१ लाख ८ हजार रुपैयाँ राजश्व संकलन गरेको छ ।
नेपाली बजार भारतीय सुन्तलाको कब्जामा देखिएको छ । उक्त अवधिमा भारतबाट ७७ करोड ४८ लाख ७२ हजार रुपैयाँ बराबरको सुन्तला नेपाल भित्रिएको हो ।
यस्तै, माघ मसान्तसम्मा इजिप्टबाट १ करोड १६ लाख ६६ हजार र साउथ अफ्रिकाबाट ९० लाख ७७ हजार रुपैयाँ बराबरको सुन्तला नेपाल आएको छ ।
वि.सं.२०७८ फागुन १७ मंगलवार १८:०५ मा प्रकाशित