काठमाडौं । नेपाली बजारमा इन्धनको मूल्य पुन बढ्ने भएको छ ।
नेपाल आयल निगमका अनुसार इन्डियन आयल कर्पोरेसनले इन्धनको मूल्य बढाएर पठाएसँग नेपाली बजारमा पुन बढाउने तयारी भएको हो ।
इन्डियन आयल कर्पाेरेसनले १५–१५ दिनमा मूल्य सूची पठाउने गरेको छ । यो पटक पनि भारतले पेट्रोलको भाउ ३.८९ रूपैयाँ, डिजेलको ३.०८ रूपैयाँ, मट्टितेलको १०.३० रूपैयाँ, हवाइ इन्धनको ३.३२ रूपैयाँ र ग्यासको ९९.१७ रूपैयाँले भाउ बढाएर पठाएको छ ।
यसअघि फागुन ७ गते प्रतिलिटर ३–३ रूपैयाँले तेलको भाउ बढेको थियो । निगमका अनुसार पुनः आज भोलि नै सोहीदरमा इन्धनको मूल्य बढ्ने छ । साथै यो पटक ग्यासको पनि मुल्य बढ्ने निगमले जनाएको छ ।
हाल कायम बिक्री मूल्यसूची र प्राप्त नया खरिद अनुसार निगमलाई पेट्रोलमा २०.५२ रूपैयाँ, डिजलमा १६.०८ रूपैयाँ र ग्यासमा प्रतिसिलिन्डर ६६५.३४ रूपैयाँ घाटा हुनेछ । मट्टितेल र हवाइ इन्धनमा नाफा भएपनि अन्य इन्धनको घाटा पूर्ति गर्न सम्भव छैन ।
यसकारण भाउ नबढाए निमगलाई आउने १५ दिनमा ३ अर्ब ९ करोड रूपैयाँ घाटा हुनेछ ।
वि.सं.२०७८ फागुन १७ मंगलवार १८:१९ मा प्रकाशित