काठमाडौं । चालु आर्थिक वर्ष २०७८/७९ को माघ मसान्तसम्ममा करिब ३२ करोड रुपैयाँ बराबरको सिमेन्ट क्लिङ्कर आयात भएको छ ।
भन्सार विभागले हालै सार्वजनिक गरेको चालु आवको ७ महिनाको तथ्याङ्क अनुसार नेपालमा ३१ करोड ९४ लाख १९ हजार रुपैयाँ बराबरको सिमेन्ट क्लिङ्कर नेपाल भित्रिएको छ ।
उक्त अवधिमा छिमेकी मुलुक भारतबाट सिमेन्ट क्लिङ्कर आयात भएको हो । चालु आवको ७ महिनामा ४७ हजार ४८८ टन सिमेन्ट क्लिङ्कर नेपाल भित्रिएको विभागले जनाएको छ ।
देशभित्रै उपलब्ध कच्चा पदार्थको उचित प्रयोग नहुँदा वार्षिक करोडौं रुपैयाँकोे सिमेन्ट क्लिङ्कर बाहिरबाट आयात हुने गरेको छ ।
देशको विभिन्न ठाउँमा रहेका चनुढुंगा खानी प्रयोग गर्न नसक्दा ठूलो मात्रामा क्लिङ्कर आयात गर्नुपरेको हो । सरकारले नेपाली चुनखानीलाई अधिकतम प्रयोग गरी क्लिङ्कर आयात शुन्यमा झारी निर्यात गर्ने योजना बनाएको छ । त्यसका लागि उद्योग मन्त्रालयले सिमेन्ट उद्योगलाई चुनखानीसम्म जाने सडक निर्माण तथा विजुली विस्तारमा सहयोग गर्दै आएको छ ।
विभागका अनुसार पछिल्लो एक महिनाको अवधि (पुस मसान्त–माघ मसान्त) सम्मको तथ्याङ्क हेर्ने हो भने सिमेन्ट क्लिङ्कर आयात १०.५७ प्रतिशतले वृद्धि भएको हो ।
चालु आवको पुस मसान्तसम्म २८ करोड ८८ लाख ८२ हजार रुपैयाँ बराबरको सिमेन्ट क्लिङ्कर आयात भएको थियो ।
विभागका अनुसार चालु आवको पहिलो महिना अर्थात साउनमा ३ करोड ४३ लाख ९८ हजार, भदौमा ८ करोड ३३ लाख ९५ हजार, असोजमा १५ करोड १६ लाख ८३ हजार रुपैयाँ बराबरको सिमेन्ट क्लिङ्कर आयात भएको जनाएको छ । चालु आवको भदौ मसान्तदेखि असोज मसान्तसम्म आईपुग्दा भने सिमेन्ट क्लिङ्कर आयात ८१.८८ प्रतिशतले बढेको हो ।
यस्तै, चालु आवको ४ महिना अर्थात कात्तिक मसान्तसम्म १९ करोड ५९ लाख ९१ हजार, मंसिरमा २४ करोड २९ लाख २६ हजारज जरुपैयाँ बराबरको ३६ हजार ३६९ टन सिमेन्ट क्लिङ्कर नेपाल भित्रिएको विभागले जनाएको छ ।
सिमेन्ट क्लिङ्कर आयातबाट सरकारले १७ करोड ३ लाख ३७ हजार रुपैयाँ राजश्व प्राप्त गरेको छ ।
वि.सं.२०७८ फागुन १८ बुधवार १२:५९ मा प्रकाशित