काठमाडौं । यस साता नेपाल स्टक एक्सचेञ्ज (नेप्से)ले तीन कम्पनीको बोनस सेयरको मूल्य समायोजन गरेको छ ।
यस साता नेप्सेले नेको इन्स्योरेन्स, एनएलजी इन्स्योरेन्स र गरिमा विकास बैंकको सेयर मूल्य समायोजन गरेको हो ।
नेप्सेले नेको इन्स्योरेन्सको १५ प्रतिशत बापतको बोनस सेयरको मूल्य समायोजनपछि १ हजार ४३ रुपैयाँ ४८ पैसा तोकेको छ ।
नेप्सेले अघिल्लो दिन अर्थात सोमबार कारोबार भएको अन्तिम सेयर मूल्य १ हजार २ सय रुपैयाँको आधारमा मूल्य समायोजन गरेको हो ।
यस्तै, बुधवार नेप्सेले एनएलजी इन्स्योरेन्स र गरिमा विकास बैंकको सेयर मूल्य समायोजन गरेको हो । यी दुवै कम्पनीहरुले साधारण सभा तथा लाभांश वितरण प्रयोजनका लागि बुधवार बुक क्लोज गरेसंगै नेप्सेले सेयर मूल्य समायोजन गरेको हो ।
नेप्सेले एनएलजी इन्स्योरेन्सको १० प्रतिशत बोनस सेयरको मूल्य समायोजनपछि ७९९ रुपैयाँ ०९ पैसा तोकेको छ । कम्पनीको बुधवार कायम अन्तिम कारोबार मूल्य ८७९ रुपैयाँका आधारमा सेयर मूल्य समायोजन भएको हो ।
यस्तै, नेप्सेले गरिमा विकास बैंकको १६ प्रतिशत बोनस सेयरको मूल्य समायोजनपछि ४८१ रुपैयाँ ३ पैसा तोकेको छ । बैंकको बुधवार कायम अन्तिम कारोबार सेयर मूल्य ५५८ रुपैयाँको आधारमा समायोजन गरेको हो ।
वि.सं.२०७८ चैत ३ बिहीवार १२:३५ मा प्रकाशित