काठमाडौं । ओपन स्पेस नेटवर्कको आयोजना र आइएनजी ग्रुपको प्रस्तुतीमा बिहीबार ‘समिट वुमन अफ द इयर २०२२’ कार्यक्रम सम्पन्न भएको छ । ३० वर्षभन्दा मुनिका महिला उद्यमीलाई पुरस्कृत गर्ने उदेश्यले कार्यक्रमको आयोजना गरिएको थियो । कानूनको पालना गर्दै दियो योजना कार्यान्वयन गरी समाजमा सकारात्मक प्रभाव पार्न सफल एक जना महिला उद्यमीलाई कार्यक्रममा पुरस्कृत गरिएको थियो ।
सात प्रदेशका १५ सहरबाट कुल ८१ जनाले पुरस्कारको लागि आवेदन परेको थियो । जसमध्ये पहिलो चरणमा उत्कृष्ट ३० जनाको नाम सर्टलिस्ट गरिएको थियो । तीमध्ये उत्कृष्ट ७ फाइनलमका लागि छनोट भएका थिए ।
उनीहरू लुक्ला आउटडोरका आङछेची शेर्पा, खानपिनका सह–संस्थापक र बन्ध निर्देशक ईशा बल्ला, ग्लोकल एकेडेमी अफ स्किल्स प्रा।लिका सह–संस्थापक र प्रबन्ध निर्देशक काजोल झा ठाकुर, को–वनर–स्वीट फिक्सका कृतिका लम्साल, द मल्ल इन्कका सजल मल्ल, ह्याप्पीमाइन्ड्सका संस्थापक र प्रबन्ध निर्देशक श्रेया गिरी र बिहे नेपालका सह–संस्थापक श्रेया कटुवाल हुन् ।
‘समिट वुमन अफ द इयर २०२२’ पुरस्कार स्विट फिक्सकी संस्थापक कृतिका लम्साललाई प्रदान गरिएको छ । उहाँले प्राकृतिक फलफूल र स्थानीय सामग्रीबाट ‘पप्सिकल्स’ बनाउँदै आउनुभएको थियो । उहाँले निर्माण गरेको वस्तु प्याकेज गरिएका त्यस्तै प्रकारका वस्तुको तुलनामा निकै स्वस्थ र स्वादिष्ट विकल्प बनेका छन् । उहाँलाई शालिमार ज्वेलर्सबाट एक लाख रुपैयाँ नगद र हिराको लकेटले सम्मान गरिएको छ ।
वि.सं.२०७८ चैत १८ शुक्रवार १२:३० मा प्रकाशित
