काठमाडौं । एनएमबि बैंक लिमिटेडले चालु आर्थिक वर्षको तेस्रो त्रैमासको अपरिष्कृत वित्तीय विवरण सार्वजनिक गरेको छ। बैंकले चालु आर्थिक वर्षको तेस्रो त्रैमाससम्ममा २ अर्ब ६६ करोड ५२ लाख रुपैयाँ खुद नाफा आर्जन गरेको छ । गत आवको यसै अवधिसम्ममा बैंकले २ अर्ब ५१ करोड ६४ लाख रुपैयाँ आर्जन गरेको थियो ।
तेस्रो त्रैमाससम्म बैंकको वितरणयोग्य मुनाफा भने ४१.६१ प्रतिशतले घटेर १ अर्ब ३२ करोड रुपैयाँमा सीमित बनेको छ। गत वर्ष यही अवधिसम्म यस्तो मुनाफा २ अर्ब २७ करोड रुपैयाँ रहेको थियो।
बैंकले प्रकाशित गरेको चैत मसान्तसम्मको वित्तीय विवरणअनुसार खुद नाफा ५.९९ प्रतिशतले बढेको हो
चैत मसान्तसम्म आइपुग्दा बैंकको खुद ब्याज आम्दानी र सञ्चालन नाफा क्रमशः २.७४ प्रतिशत र ४.६४ प्रतिशत ले बढेको छ । यसले गर्दा बैंकले थोरैले भएपनि नाफा बढाउन सफल भएको छ । सो प्रतिशतले बृद्धि भई बैंकको खुद ब्याज आम्दानी ४ अर्ब ४२ करोड ७२ लाख रुपैयाँ र संचालन मुनाफा ३ अर्ब ७८ करोड रुपैयाँ पुगेको छ ।
बैंकको निक्षेप संकलन १२.४३ प्रतिशत र कर्जा लगानी १७.४२ प्रतिशत ले वृद्धि भएको छ । बैंकको वार्षिकीकृत प्रतिसेयर आम्दानी (ईपीएस) बढेको छ। गत वर्ष यही अवधिसम्म रु. १८.३४ रहेको ईपीएस बढेर १९.३५ रुपैयाँ कायम भएको छ। बैंकको प्रतिसेयर नेटवर्थ रु. १४२.२१ र पीई अनुपात १५.१४ गुणा कायम भएको छ।
वि.सं.२०७९ वैशाख ७ बुधवार १३:४६ मा प्रकाशित
