काठमाडौं । मर्जरमा जानका लागि हिमालयन जनरल इन्स्योरेन्स र एभरेष्ट इन्स्योरेन्स कम्पनीले सहमति गरेका छन् ।
यी दुवै कम्पनीले एक आपसमा मर्जरमा जानका लागि विहीबार समझदारी पत्रमा हस्ताक्षर भएको गरेका हुन् ।
उक्त समझादारी पत्रमा एभरेष्टको तर्फदेखि अध्यक्ष राजिव सापकोटा र हिमालयन जनरलको तर्फदेखि महेन्द्रकृष्ण श्रेष्ठले हस्ताक्षर गरेका छन् ।
मर्जर प्रक्रिया अगाडि बढाउन दुवै कम्पनीले ६ सदस्यीय मर्जर कमिटि समेत गठन गरेका छन् । दुवै कम्पनीका ३/३ जना सञ्चालकको प्रतिनिधित्व हुने गरि मर्जर कमिटी समेत गठन गरिएको हो ।
बीमा समितिले एक महिना अघि पुँजी वृद्धिको योजना ल्याएको थियो । सोही योजनापछि यी दुई कम्पनीहरु मर्जरमा जान लागेका हुन् ।
बीमा क्षेत्रमा हालसम्म कुनै पनि कम्पनीहरु मर्जरमा गएका छैनन् । त्यसैले यी दुई कम्पनी एकआपसमा मर्ज भएमा बीमा क्षेत्रकै पहिलो मर्जर कम्पनी हुनेछ ।
हाल निर्जीवन बीमा कम्पनीको १ अर्ब र जीवन बीमा कम्पनीको २ अर्ब रुपैयाँ न्यूनतम चुक्तापुँजी हुनुपर्ने व्यवस्था छ ।
समितिले आगामी चैत मसान्तभित्र चुक्ता पुँजीको न्यूनतम सिमा निर्जीवन बीमा कम्पनीको २ अर्ब ५० करोड र जीवन बीमा कम्पनीको ५ अर्ब रुपैयाँ पुर्याउनुपर्ने निर्देशन जारी गरेको छ ।
वि.सं.२०७९ वैशाख २२ बिहीवार २२:३० मा प्रकाशित
