काठमाडौं । अपर तामाकोशी हाइड्रोपावर कम्पनीले चालु आर्थिक वर्ष २०७८/७९ को तेस्रो त्रैमासिक वित्तीय विवरण गरेको छ ।
उक्त अवधिमा कम्पनीको नोक्सानी झनै बढेको छ । चालु आवको चैत मसान्तसम्मा कम्पनी १ अर्ब ६५ करोड ६ लाख ५५ हजार रुपैयाँ नोक्सानीमा रहेको छ ।
कम्पनी गत वर्षको तेस्रो त्रैमासमा पनि ३ करोड ५० लाख २८ हजार रुपैयाँ नोक्सानीमा रहेको थियो ।
वित्तीय विवरणमा उल्लेख भएअनुसार कम्पनी र विद्युत् प्राधिकरणबीच आय गणनामा भएको भिन्नता र आयोजनाले प्राधिकरणलाई आपूर्ति गर्नुपर्ने डिसप्याच नभएको एवं विद्युत् खरीद सम्झौता अनुसार उत्पादन नभएकोले त्यसको असर नाफामा परेको हो ।
चालु आवको नौ महिनमामा कम्पनीले विद्युत बिक्रीबाट ५ अर्ब १६ करोड ३३ लाख ३४ हजार रुपैयाँ आम्दानी गरेको छ ।
कम्पनीको चुक्ता पुँजी १० अर्ब ५९ करोड रुपैयाँ रहेको छ । कम्पनीको जगेडा कोष भने २ अर्ब ७१ करोड रुपैयाँ ऋणात्मक रहेको छ ।
कम्पनीले गत भदौ २५ गतेबाट दोलखा जिल्लामा ४५६ मेगावाट क्षमताको आयोजना निर्माण सम्पन्न गरी राष्ट्रिय विद्युत् प्रणालीमा जोडेर विद्युत् उत्पादन गरिरहेको छ ।
वि.सं.२०७९ जेठ २ सोमवार १६:०६ मा प्रकाशित
