काठमाडौं । गत असार ८ गते बुधवार दोर्दी खोला जलविद्युत कम्पनीको आइपीओ बाँडफाँड सम्पन्न भईसकेको छ ।
बिक्री प्रबन्धक सिद्धार्थ क्यापिटलका अनुसार कम्पनीको आईपीओ मागभन्दा धेरै आवेदन परेको हुनाले कम्पनीको आईपीओ गोलाप्रथाद्वारा वितरण गरिएको थियो ।
गोलाप्रथाबाट वितरण गर्दा भाग्यमानी २ लाख १ हजार ९ सय ७५ जना लगानीकर्ताहरूले १० कित्ताका दरले र बाँकी ९ जनाले ११ कित्ता सेयर हात पारेका छन् भने बाँकी १३ लाख ६२ हजार ५ सय ३६ जनाको भने हात खाली भएको छ ।
कम्पनीको आईपीओमा अन्तिम दिनसम्म कुल १५ लाख ६४ हजार ५२२ जनाले १ करोड ७९ लाख ३३ हजार ७० कित्ताका बराबरको कुल १ अर्ब ७९ करोड ३३ लाख ७ हजार रुपैयाँ बरारको आवेदन परेको थियो ।
अन्तिम दिनसम्म १५ लाख ६४ हजार ५ सय २२ जना लगानीकर्ताले १ करोड ७९ लाख ३३ हजार ७० कित्ताका लागि आवेदन दिएका थिए ।
कम्पनीको आईपीओले पहिलो कारोबारको लागि १०२ रुपैयाँ ३९ पैसादेखि ३०७ रुपैयाँ १७ पैसा ओपन रेञ्ज पाउने देखिएको छ ।
कम्पनीको आर्थिक वर्ष २०७७/७८ को वास्तविक प्रतिशेयर नेटवर्थ १०२ रुपैयाँ ३९ पैसा रहेको छ । जसका आधारमा कम्पनीको आईपीओले पहिलो कारोबारका लागि उक्त रेञ्ज पाउने देखिएको हो ।
नेपाल स्टक एक्सचेञ्ज (नेप्से) ले कम्पनीको पहिलो कारोबारको लागि नेटवर्थको तीन गुणासम्म मूल्य रेञ्ज तोक्ने गर्दछ । कम्पनीको आईपीओ हाल नेप्सेमा सूचीकरण प्रक्रियामा रहेको छ ।
कम्पनीले जेठ २६ गतेदेखि जेठ ३१ गतेसम्म प्रतिकित्ता १०० अंकित दरका २१ लाख ९५ हजार ५०९ कित्ता साधारण सेयर निष्काशन तथा बिक्री खुला गरेको थियो ।
जसमध्ये ३ प्रतिशत अर्थात ६५ हजार ८६५ कित्ता कम्पनीका कर्मचारीहरुका लागि, ५ प्रतिशत अर्थात १ लाख ९ हजार ७७५ कित्ता सेयर सामूहिक लगानी कोषहरुका लागि र बाँकी २० लाख १९ हजार ८३९ कित्ता सेयर सर्वसाधारण लगानीकर्ताका लागि छुट्याएको थियो ।
वि.सं.२०७९ असार १५ बुधवार १६:३२ मा प्रकाशित