काठमाडौं । नेपाल लाइफ इन्स्योरेन्स कम्पनीले ३५ करोड बढी नोक्सानीमा रहेको छ ।
कम्पनीले शुक्रबार प्रकाशित गरेको गत आर्थिक वर्ष २०७८/७९ को चौंथो त्रैमासिक वित्तीय विवरणले यस्तो देखाएको हो ।
विवरण अनुसार गत आवमा कम्पनी ३५ करोड २७ लाख ३८ हजार रुपैयाँ नोक्सानीमा रहेको छ । अघिल्लो आवमा ५३ करोड ५९ लाख ४३ हजार रुपैयाँ नाफा गरेको कम्पनी गत आवमा भने ऋणात्मक देखिएको हो । गत आवमा कम्पनीको खर्च वृद्धि भई आम्दानीमा गिरावट आएका कारण नोक्सानीमा गएको हो ।
अघिल्लो आवमा कम्पनीको ९२ करोड ९६ लाख ३ हजार रुपैयाँ आम्दानी गरेकोमा गत वर्ष भने १५.८९ प्रतिशतले घटेको छ । गत आवमा कम्पनीको आम्दानी ७८ करोड १८ लाख ७५ हजार रुपैयाँमा सिमित भएको छ ।
गत आवमा कम्पनीको कुल बीमाशुल्क आजर्न रकम ३५ अर्ब ४४ करोड ४९ लाख ३१ हजार रुपैयाँ कायम पुगेको छ । अघिल्लो आवमा भने कम्पनीको कुल बीमाशुल्क आर्जन रकम ३२ अर्ब ३६ करोड ९७ लाख ५६ हजार रुपैयाँ मात्र रहेको थियो ।
कम्पनी गत आवमा १३ अर्ब ३२ करोड ७१ लाख ९ हजार रुपैयाँ कुल दावी भुक्तानी गरेको छ भने भुक्तानी हुन बाँकी दावी रकम १ अर्ब ७१ करोड ५२ लाख ६० हजार रुपैयाँ देखिएको छ।
कम्पनीको चुक्ता पुँजी ८ अर्ब २० करोड ७९ लाख ६६ हजार रुपैयाँ रहेको छ । कम्पनीले जगेडा तथा कोषमा भने २८ करोड ८३ लाख ७० हजार रुपैयाँ राखेको छ ।
कम्पनीको प्रतिसेयर आम्दानी पनि ऋणात्मक देखिएको छ। अघिल्लो आवमा ७ रुपैयाँ ४४ पैसा रहेको प्रतिसेयर आम्दानी गत आवमा भने ४ रुपैयाँ ३० पैसा ऋणात्मक देखिएको हो । कम्पनीको प्रतिसेयर नेटवर्थ पनि १७३ रुपैयाँ ८२ पैसा ऋणात्मक रहेको छ।
वि.सं.२०७९ साउन २७ शुक्रवार १२:०१ मा प्रकाशित