काठमाडौं । आइएमई लाइफ इन्स्योरेन्स कम्पनीले गत आर्थिक वर्ष २०७८/७९ को चौंथो त्रैमासिक वित्तीय विवरण सार्वजनिक गरेको छ ।
विवरण अनुसार कम्पनीले १२ करोड ८६ लाख ५५ हजार रुपैयाँ नाफा कमाएको छ । जुन अघिल्लो आवको सोही अवधिको तुलनामा १.३४प्रतिशतले कमी हो । अघिल्लो आवमा कम्पनीले १३ करोड ४ लाख ९ हजार रुपैयाँ नाफा कमाएको थियो ।
गत आवमा कम्पनीको कुल बीमाशुल्क आर्जन २६.५२ प्रतिशतले वृद्धि भई ३ अर्ब ५३ करोड ८१ लाख ७४ हजार रुपैयाँ पुगेको छ ।
यस्तै, गत आवमा कम्पनीले ९६ करोड ९० हजार रुपैयाँ कुल दावी भुक्तानी गरेको छ । उक्त अवधिमा कम्पनीको भुक्तानी हुन बाँकी दावी रकम भने २ करोड १९ लाख ५० हजार रुपैयाँ देखिएको छ ।
कम्पनीको चुक्ता पुँजी १ अर्ब ४० करोड रुपैयाँ रहेको छ । कम्पनीले जगेडा तथा कोषमा ७७ करोड ६८ लाख १९ हजार रुपैयाँ राखेको छ ।
यस्तै, जीवन बीमा कोषमा ४ अर्ब ७१ करोड ३१ लाख ८३ हजार रुपैयाँ र महाविपत्ति जगेडामा ८ करोड ६३ लाख १३ हजार रुपैयाँ राखेको छ ।
कम्पनीको प्रतिसेयर आम्दानी ९ रुपैयाँ १९ पैसा र प्रतिसेयर नेटवर्थ १६१ रुपैयाँ ६५ पैसा रहेको छ ।
वि.सं.२०७९ साउन ३१ मंगलवार १४:०२ मा प्रकाशित