काठमाडौं । आज अर्थात भदौ १५ गतेदेखि मिर्मिरे लघुवित्त वित्तीय संस्था लिमिटेडले बुद्धज्योती लघुवित्त वित्तीय संस्था लिमिटेडलाई प्राप्ति गरे पछि एकीकृत कारोबार सुरु गरेको छ ।
मिर्मिरेले बुद्धज्योतिलाई अक्वायर गरेपछि ‘मिर्मिरे लघुवित्त वित्तीय संस्था लिमिटेड’ कै नामबाट एकीकृत कारोबार सुरु भएको हो ।
मिर्मिरेले बुद्धज्योतिलाई प्राप्ति गर्ने सम्बन्धमा दुवै संस्थाको गत असार ३१ गते छुट्टाछुट्टै बसेको विशेष साधारण सभाबाट विशेष प्रस्ताव पारित भएको थियो ।
सो पश्चात् नेपाल राष्ट्र बैंकबाट भदौ ६ गते मिर्मिरेले बुद्धज्योतिलाई प्राप्तिका लागि अन्तिम स्वीकृत प्राप्त भएको र कम्पनी रजिष्ट्रारको कार्यालयको भदौ ९ गतेको पत्रबाट बुद्धज्योति लघुवित्तको लेखाङ्कन हिसाबमा समायोजन गर्नुपर्ने गरी स्वीकृति भएको हो ।
सोअनुसार मिर्मिरे र बुद्धज्योति लघुवित्त वित्तीय संस्थाले भदौ १५ गतेदेखि एकीकृत कारोबार गर्ने जनाएको हो । एकीकृत कारोबार सुरु हुने दिन वित्तीय संस्थाका मातहतका सबै कार्यालयहरु बन्द रहने कम्पनीले जनाएको छ ।
प्राप्तिपश्चात् बन्ने मिर्मिरे लघुवित्त वित्तीय संस्था लिमिटेडको केन्द्रीय कार्यालय साविककै बनेपा नगरपालिका वडा नं. ८, बनेपाबजार, काभ्रेपलाञ्चोकमा नै रहने कम्पनीले जनाएको छ ।
साथै एकीकृत कारोबार पश्चात बन्ने मिर्मिरे लघुवित्तको अधिकृत पुँजी ६० करोड र चुक्ता पुँजी ५३ करोड १२ लाख रुपैयाँ पुग्ने छ । त्यस्तै, शाखा संख्या १५० वटा पुग्ने छन् ।
वि.सं.२०७९ भदौ १५ बुधवार १२:०७ मा प्रकाशित
