विशाल बस्नेत, महोत्तरी । सोमबार बेलुका बर्दिबास नगरपालिकाका कृषि साखाका कृषि अधिकृत विष्णुदेव साहले आत्तिदै नगरका प्रवक्ता विजय महतोलाई फोन गरे । तीन वर्षदेखि बस्दै आएको कृषि कार्यालयस्थित निवासमा नगरका कार्यकारी अधिकृत धर्मानन्द जोशीले एका एक नगर प्रहरी लगाएर क्वाटरमा ताला लगाइदिएको उनको गुनासो थियो ।
प्रवक्ता महतो अधिकृत साहको गुनासो सुनिसकेपछि कार्यकारी भएको ठाउँमा पुगे । एक रात छाडिदिनुस् भोलि छलफल गरौंलाभन्दा पनि कार्यकारी जोशीले अस्वीकार गरेको प्रवक्ता महतोको आरोप छ ।
नगरप्रमुख प्रल्हादकुमार क्षेत्रीले भने साहलाई प्रक्रियाअनुसार नै क्वाटरबाट हटाएको बताए । विष्णुदेव साहकी श्रीमती सुनितादेवी सुडी कार्याकारीले आफूहरूमाथि ज्यादति भएको र न्याय दिन आग्रह गरिरहेकी छिन् ।
के भएको थियो ?
२५ असोजमा विष्णुदेवलाई कार्यकारी अधिकृत जोशीले बोलाएका थिए । साह नगरपालिकास्थित जोशीको चेम्बरमा पुग्दा उपप्रमुख तारादेवी र उनका स्वकीय श्रीमान त्यही थिए । वष्णुदेवका अनुसार कार्यकारीले नगरको लागि मल आएको र उक्त मल बिक्रेता सहकारीहरूलाई खबर गरेर नविकरण गर्न निर्देशन दिए ।
साह तुरुन्त आफ्नो कार्यालयमा फर्किए र बिक्रेता सहकारीहरूलाई निवेदन ल्याउन अनुरोध गरे । दिनको करिब २ बजे कार्यकारीको तोक लगाएका केही निवेदन आए । त्यसमध्ये पशुपति जन उपभोक्ता सहकारी र लालीगुँरास जनउपभोक्ता सहकारीले तोक लगाएको निवेदनलाई साहले हेरेर नवीकरण गरिदिए ।
त्यसपछि कार्यकारी जोशीले फोन गरे र क-कसले नवीकरण गराए भन्ने जिज्ञासा राखे । साहले नवीकरण गरिसकेकाहरूको विवरण दिदा कार्यकारी जोशी निक्कै आक्रोशित भए ।
विष्णुदेवका अनुसार कार्यकारीले गालीमात्र गरेनन् अपशब्द नै बोले । नवीकरण गरेका दुई सहकारीमध्ये पशुपति जनउपभोक्ता सहकारीले पहिला नगरविरुद्ध उच्च अदालतमा मुद्दा दायर गरेको थियो । पशुपतिलाई बिक्रेताबाट नगरले हटाएपछि अदालत गएको र खारेज नगर्न अन्तरिम आदेश लिएर आएको थियो ।
नगरविरुद्ध मुद्दा हाल्ने सहकारीलाई किन नवीकरण गरेको भन्दै कार्याकारीले गाली र अपशब्द बोलेको साहको भनाइ छ । यही कारण क्वाटरबाट निकालेको साहको दाबी छ ।
निरकुंश बन्दै नगरपालिका
बर्दिबास नगरपालिका निरकुंश बन्दै गएको सर्वसाधारणको आरोप छ । पूर्व वडाध्यक्ष भरत हमाल नगरप्रमुख र कार्यकारीको काम गर्ने सैली राम्रो नभएको बताउँछन् । यदि कर्मचारीले गल्ती गरे विभागीय कारवाही र सरुवा गर्न सकिने भए पनि बदला लिने नाममा धरपकड गर्नु गलत हो । उनले भने ।
कार्याकारी धर्मान्द जोशीले कर्मचारीमाथि तानाशाहको जस्तो गरेको गुनासो बढेको छ । उनी यसअघि भंगाहा नगरपालिकामा थिए । कार्यकारी जोशीको शैलीकै कारण त्यहाँ कर्मचारी र जनप्रतिनिधिबाट असहयोग भएपछि उनी बर्दिबास आएका थिए ।
उनको कार्यशैली कै कारण पुर्व नगरप्रमुख विदुर कार्कीले कार्यालयमा हाजिरी नै गराएका थिएनन् । पछि प्रल्हाद क्षेत्री निर्वाचित भएपछि पुनः आएका हुन् ।
वि.सं.२०७९ कात्तिक २ बुधवार १३:४८ मा प्रकाशित
