काठमाडौं । नेकपा एमाले उपाध्यक्ष एवं प्रतिनिधि सभा सदस्य उम्मेदवार विष्णु पौडेलले पुँजी बजारको विकास र विस्तारमा विशेष ध्यान दिइने बताएका छन् । बुटवलमा आज एक कार्यक्रममा पूर्व अर्थमन्त्री समेत रहेका पौडेलले पुँजी बजारका समस्या समाधान गरी लगानीकर्ताको मनोबल उठाउने काम आफुले सदैव गरेको र गर्ने जनाएका छन् ।
उनले लगानीकर्ताको लगानी तथा प्रतिफल सुरक्षित गर्ने प्रतिबद्धता आफ्नो घोषणापत्रमा उल्लेख गरेका छन् । उनले आफ्नो घोषणापत्रको उद्योग तथा ब्यापार शिर्षकको १० नम्बर बुँदामा यस्तो प्रतिबद्धता जनाएका हुन् ।
कार्यक्रममा पौडेलले भविष्यमा रुपन्देही २ मात्र नभई जिल्लालाई नै विकासको रोलमोडेल बनाउने घोषणा पनि गरेका छन् । उनले यसअघि पनि आफ्नो ड्रिम प्रोजेक्टको रूपमा राखेको कालीगण्डकी–तिनाउ बहुउद्देश्यीय नदी डाइभर्सन परियोजना अघि बढाउने बताएका छन् ।
पौडेलले आफ्नो एजेन्डामा निजी क्षेत्रको लगानीमा केबुलकार सेवा सञ्चालन हुन लागेका नुवाकोट, वसन्तपुर र आसपासको क्षेत्रलाई हिल स्टेसन र रमणीय पर्यटकीयस्थलमा विकास गर्ने उल्लेख गरेका छन् ।
यस्तै, वृहत् लुम्बिनी क्षेत्रअन्तर्गतका सहरहरूलाई उच्चस्तरीय एवम् आधुनिक सडक सञ्जालबाट जोडिने छ र सुविधायुक्त सार्वजनिक यातायात सञ्चालन गर्ने पनि पौडेलको घोषणापत्रमा उल्लेख छ । गौतम बुद्ध अन्तर्राष्ट्रिय विमानस्थललाई पूर्णक्षमतामा सञ्चालन गरिने जनाउँदै प्रतिबद्धता पत्रमा उल्लेख गरिएको छ ।
वि.सं.२०७९ कात्तिक २० आइतवार १६:५८ मा प्रकाशित
