काठमाडौं । हिमालयन बैंकले वार्षिक साधारण सभा बोलाएको छ । साधारण सभा होटल सोल्टी, काठमाडौंमा पुस २८ गते बिहान ११ बजे सुरु हुनेछ ।
सभामा सेयरधनीहरुलाई ८ प्रतिशत बोनस सेयर र ११.११ प्रतिशत नगद गरी कुल १९.११ प्रतिशत लाभांश वितरण गर्ने मुख्य प्रस्ताव पेश हुनेछ ।
यस्तै, सम्पति तथा दायित्व मूल्यांकनका आधारमा तय भएको १००ः८०.२८ सेयर स्वाप अनुपातमा सिभिल बैंकलाई एक्वायर गर्ने प्रस्ताव पनि सभामा पेश हुनेछ । अर्थात, उक्त स्वाप रेसियोका आधारमा सिभिल बैंकको १०० कित्ता सेयर हुनेले एक्विजिसनपछि हिमालयन बैंकको ८०.२८ कित्ता सेयर पाउने छन् ।
एक्विजिसन प्रक्रियामा भएका सम्पूण समझदारी र सम्झौताहरुलाई पनि सभामार्फत अनुमोदन गरिने भएको छ । एक्विजिसन पश्चात हिमालयन बैंककै नामबाट एकीकृत कारोबार गर्न सभाबाट स्वीकृति लिने एजेन्डा पनि रहेको छ ।
सभा प्रयोजनका लागि पुस १८ गतेदेखि बुक क्लोज हुनेछ । यसर्थ, पुस १७ गतेसम्म कायम रहने सेयरधनीहरुले मात्र सभामा भाग लिन र प्रस्तावित लाभांश पाउन सक्नेछन् ।
वि.सं.२०७९ पुस ७ बिहीवार १०:२८ मा प्रकाशित