काठमाडौं । थप २ हाइड्रोपावर कम्पनीले आईपिओ निष्काशनको अनुमति पाएका छन् । नेपाल धितोपत्र बोर्डले मकर जितुमाया सुरी हाइड्रोपावर लिमिटेड र सानिमा मिडिल तमोर हाइड्रोपावर लिमिटेडलाई आईपिओ निष्काशनको अनुमति दिएको हो । दुवै कम्पनीले पुस ७ गते बोर्डबाट अनुमति पाएका हुन् ।
मकर जितुमाया सुरी हाइड्रोपावरले २२ करोड ८० लाख बराबरको २२ लाख ८० हजार कित्ता शेयर निष्काशन गर्न लागेको हो । कम्पनीले आईपिओ निष्काशनको लागि प्रभु क्यापिटललाई बिक्री प्रबन्धकमा नियुक्त गरेको छ ।
यस कम्पनीले दोलखामा २ वटा जलविद्युत आयोजना निर्माण गरिरहेको छ । दुई आयोजनाको कुल क्षमता १३.४ मेगावट रहेको छ ।
त्यस्तै सानिमा मिडिल तमोर हाइड्रोपावर लिमिटेडले ८३ करोड ३१ लाख २५ हजार रुपैयाँ बराबरको ८३ लाख ३१ हजार २ सय ५० कित्ता शेयर निष्काशनको लागि अनुमति पाएको हो ।
शेयर निष्काशनको लागि सानिमा क्यापिटल बिक्रि प्रबन्धक रहेको छ । कम्पनीले ताप्लेजुङमा ७३ मेगावाटको मिडिल तमोर हाइड्रोपावर आयोजना निर्माण गरिरहेको छ ।
वि.सं.२०७९ पुस १२ मंगलवार १०:५५ मा प्रकाशित