काठमाडौं । २० वटा वाणिज्य बैंकले चालु आर्थिक वर्ष २०७९/८० को दोस्रो त्रैमाससम्मको अपरिस्कृत वित्तीय विवरण सार्वजनिक गरेका छन् । सञ्चालनमा रहेका २२ वटा वाणिज्य बैंकहरूमध्ये नेपाल इन्भेष्टमेण्ट मेगा बैंक र कुमारी बैंकले दोस्रो त्रैमासको वित्तीय विवरण सार्वजनिक गर्न बाँकी छ ।
वित्तीय विवरण सार्वजनिक गर्नेमध्ये एक दर्जनभन्दा बढी वाणिज्य बैंकको नाफा वृद्धि भएको छ । दोस्रो त्रैमासमा वाणिज्य बैंकहरूको खराब कर्जा बढेको छ । त्यसको प्रभाव देखिएको भए पनि कतिपय बैंकहरूले भने नाफा राम्रै आर्जन गरेको देखिन्छ ।
चालु आर्थिक वर्षको दोस्रो त्रैमाससम्ममा सबैभन्दा बढी नाफा नबिल बैंक लिमिटेडले गरेको छ । यो बैंकले ६ महिनाको अवधिमा ३ अर्ब ४१ करोड ७९ लाख रुपैयाँ नाफा आर्जन गरेको छ । त्यस्तै, बढी नाफा गर्ने दोस्रोमा एनआईसी एशिया बैंक रहेको छ । यो बैंकले पनि ६ महिनाको अवधिमा ३ अर्ब २७ करोड ३३ लाख रुपैयाँ नाफा आर्जन गरेको छ । साथै बीओकेलाई प्राप्ति गरेको ग्लोबल आइएमई बैंकले पनि यस अवधिसम्म २ अर्ब ७८ करोड खुद नाफा आर्जन गरेको छ ।
त्यस्तै राष्ट्रिय वाणिज्य बैंकले २ अर्ब ७१ करोड, एनएमबि बैंकले १ अर्ब ९० करोड, स्ट्याण्डर्ड चार्टर्ड बैंकले १ अर्ब ७५ करोड, प्राइम कमर्सियल बैंकले १ अर्ब ६५ करोड, सानिमा बैंकले १ अर्ब २८ करोड, प्रभु बैंकले १ अर्ब १९ करोड, नेपाल एसबिआई बैंकले १ अर्ब १७ करोड, नेपाल बैंकले १ अर्ब १७ करोड, सिद्धार्थ बैंकले १ अर्ब १६ करोड, लक्ष्मी बैंकले १ अर्ब ७ करोड र माछापुच्छ्रे बैंकले १ अर्ब २ करोड रुपैयाँ नाफा कमाएको छ ।
हिमालयन बैंकले ९५ करोड, सिटिजन्स बैंकले ८४ करोड, सनराइज बैंकले ६५ करोड, सिभिल बैंकले ६२ करोड रुपैयाँ नाफा आर्जन गरेको छ ।
तर, सर्वाधिक नाफा वृद्धिदर बढ्नेमा एभरेष्ट बैंक रहेको छ । यो बैंकको नाफा आर्थिक वर्षको दोस्रो त्रैमाससम्मको तुलनामा ८९.२९ प्रतिशतले वृद्धि भएको छ । बैंकले चालु आर्थिक वर्षको ६ महिनामा १ अर्ब ५८ करोड ८० लाख रुपैयाँ नाफा आर्जन गरेको छ ।
गत आर्थिक वर्षको दोस्रो त्रैमाससम्मको तुलनामा चालु आर्थिक वर्षको सोही अवधिसम्म २० वाणिज्य बैंकहरूमध्ये सात वाणिज्य बैंकको नाफा घटेको छ । सर्वाधिक नाफा घट्नेमा कृषि विकास बैंक रहेको छ । यो बैंकको नाफा १०९ प्रतिशत घटेको छ ।
गत वर्षको पुस मसान्तसम्म एक खर्ब ४२ करोड २५ लाख रुपैयाँ नाफा आर्जन गरेको यो बैंक चालु आर्थिक वर्षको सोही अवधिसम्ममा १२ करोड ८९ लाख ३३ हजार रुपैयाँ नोक्सानीमा छ । त्यस्तै, नाफा घट्नेमा सिटिजन्स, सिद्धार्थ, नेपाल बैंक, सनराइज, प्रभु र प्राइम कमर्सियल बैंक रहेका छन् ।
वि.सं.२०७९ माघ ८ आइतवार १५:२३ मा प्रकाशित
