काठमाडौं । आर्थिक मिडिया सञ्चालक संघ (इमान)को प्रथम साधारण सभाले केटिएम भ्वाइस डटकमका रोयल आचार्यको अध्यक्षतामा नौ सदसिय कार्यसमिति निर्वाचित गरेको छ ।
आज बुधबार काठमाडौंको बानेश्वरमा सम्पन्न साधारण सभाले उपाध्यक्ष द्वयमा दैनिकी डटकमका माधव तिवारी र अर्थबजार डटकमका डिल्लि सापकोटा, महासचिवमा अर्थसरोकार डटकमका सुरज प्याकुरेल, उपमहासचिवमा अर्थतन्त्र डटकमका रामेश्वर कार्की, सचिवमा क्रसचेक मासिकका टंक कार्की, सहसचिवमा आर्थिकप्लस डटकमका अमिर लामा, कोषाध्यक्षमा रोजगार मिडियाका फणिन्द्र प्रसाद दाहाल र सदस्यमा कर्पोरेटबजार डटकमका अप्सरा गौतम निर्वाचित गरेको हो ।
त्रिभुवन विश्व विद्यालय पत्रकारिता विभागका प्रमुख प्राध्यापक चिरञ्जिवी खनाल मुख्य निर्वाचन अधिकृत रहेको निर्वाचन समितिले निर्वाचनका सम्पूर्ण प्रक्रिया पुरा गरी निर्वाचित कार्यसमितिलाई प्रमाणपत्र हस्तान्तरण गरेको छ । कार्यक्रममा प्रेस काउन्सिलका सदस्य दीपक पाण्डे, अधिवक्ता शशी मरासैनी, वरिष्ठ पत्रकार लव प्याकुरेल, त्रिविका उपप्राध्यापक देवराज अर्याल लगायतको उपस्थिति थियो ।
संघले आर्थिक मिडिया सञ्चालकको हकहितमा काम गर्दै मुलुकको आर्थिक अवस्थाबारे बहस, पैरवी गर्दै सरोकारवाला निकायको ध्यानाकर्षण गराउने, विकास र समृद्धि तर्फ लाग्न प्रेरित गर्ने उद्देश्य लिएको छ ।
वि.सं.२०७९ माघ ११ बुधवार १९:५३ मा प्रकाशित
