लमजुङ । लमजुङमा दोर्दी गाउँपालिकाबाट राष्ट्रिय परिचय पत्रको विवरण कार्य सुरु भएको छ ।
पहिलो चरणमा दोर्दी गाउँपालिकाको ९ वटै वडाबाट विवरण संकलन कार्य सुरु गरिएको जिल्ला प्रशासन कार्यलय लमजुङले जनाएको छ । आइतबार देखि दोर्दीका सवै वडाबाट एकैसाथ विवरण संकलन सुरु गरिएको छ ।
विवरण संकलनका लागि राष्ट्रिय परिचय पत्र तथा पञ्जिकरण विभागबाट खटिएका विवरण अपरेटरहरु वडा वडामा पुगेर विवरण संकलन गरिरहेका छन् । एउटा वडामा २ जना विवरण अपरेटर, रुजु अधिकारीे रुपमा वडा सचिव र एक जना स्वयमसेवक खटाइएकोे छ ।
आइतबार पहिलो दिन सिस्टम अपडेट गर्ने लगायतका काम गरिएकाले द्रुत गतिमा संकलन हुन नसकेको विभागका इन्जिनियर अबोध अलिले बताए । पहिलो दिन गाउँपालिकाका सवैवडाबाट करिव दुईसय जनाको विवरण संकलन गरिएको छ ।
दोर्दी गाउँपालिकामा करिव १० दिनमा विवरण संकलन गरिसक्ने योजना रहेको उनले बताए । दोर्दी गाउँपालिका पछि मध्यनेपाल नगरपालिकाबाट विवरण संकलन गरिने छ । आवश्यक अपरेटरहरु थप गरेर सवै पालिका र वडा मा छिटै पुगेर विवरण संकलन गरिने अलिले बताए ।
राष्ट्रिय परिचयपत्र तथा पञ्जिकरण विभागबाट खटिएका विवरण अपरेटरहरु दोर्दीको सवै वडामा पुगेर विवरण संकलन गरिहेका छन् ।
नागरिकता भएका हरेक नागरिकको वडाबाटै राष्ट्रिय परिचयपत्रका लागि विवरण संकलन गर्न थालिएको छ ।
जिल्लाकै ८ वटा स्थानीय तहबाट विवरण संकलन गरिने यो कार्य ३ महिनाभित्र सक्ने लक्ष्य लिइएको छ ।
प्रशासन कार्यालयका अनुसार लमजुङमा हालसम्म करिव ३५ हजार नगारिकले राष्ट्रिय परिचय पत्रको लागि विवरण भरेर राष्ट्रिय परिचयपत्रको नम्बर लिइसकेका छन् ।
वि.सं.२०७९ माघ ११ बुधवार २०:३२ मा प्रकाशित
