काठमाडौं । एसियन हाइड्रोपावरले सर्वसाधारणका लागि आइपीओ बिक्री खुला गर्ने भएको छ । कम्पनीले माघ २७ गतेदेखि ६ लाख ९७ हजार २ सय कित्ता आइपीओ जारी गर्न लागेको हो ।
कम्पनीले आफ्नो जारी पुँजी ३४ करोड रुपैयाँको २४.७१ प्रतिशत अर्थात् ८ लाख ४० हजार कित्ता सेयर सर्वसाधारणलाई छुट्याएको छ । यो मध्ये १० प्रतिशत अर्थात् ८४ हजार कित्ता सेयर वैदेशिक रोजगारीमा रहेका नेपालीहरुका लागि निष्काशन गरिसकेको छ ।
५ प्रतिशत अर्थात् ४२ हजार कित्ता सामुहिक लगानी कोष र २ प्रतिशत अर्थात् १६ हजार ८ सय कित्ता कर्मचारीहरुलाई छुट्याएको छ ।
बाँकी ६ लाख ९७ हजार २ सय कित्ताका लागि सर्वसाधारणले आवेदन दिन सक्नेछन् । यसमा फागुन २ गतेसम्म आवेदन दिन सकिनेछ यदि सो अवधिमा सबै सेयर बिक्री नभएमा फागुन १२ गतेसम्म आवेदन दिन सक्नेछन्।
लगानीकर्ताले यसमा न्यूनतम १० कित्तादेखि अधिकतम २० हजार कित्ताको लागि आवेदन दिन सक्नेछन् । लगानीकर्ताले सी–आस्वा प्राप्त बैंक तथा वित्तीय संस्था तथा मेरो सेयरमार्फत सेयर भर्न सक्नेछन् । यसमा बिक्री प्रबन्धकको काम एनएमबि क्यापिटल लिमिटेडले गरेको छ ।
वि.सं.२०७९ माघ १७ मंगलवार १२:४४ मा प्रकाशित
