काठमाडौं । बुटवल पावर कम्पनीले चालु आर्थिक वर्षको दोस्रो त्रैमाससम्मको वित्तीय विवरण सार्वजनिक गरेको छ । कम्पनीले प्रकाशित गरेको विवरण अनुसार गत आर्थिक वर्षको पुस मसान्तको तुलनामा चालु आर्थिक वर्षको सोही अवधिसम्ममा कम्पनीको वित्तीय आम्दानी १५.४९ प्रतिशत बढेको छ।
बैंकहरुको मुद्दति निक्षेपमा ब्याजदर बढेका कारण यस्तो आम्दानी बढ्न पुगेको कम्पनीको विवरणमा उल्लेख गरेको छ। गत आर्थिक वर्षको पहिलो ६ महिनासम्ममा ४ करोड ९६ लाख रुपैयाँ रहेको कम्पनीको यस्तो आम्दानी, चालु आर्थिक वर्षको सोही अवधिसम्ममा बढेर ५ करोड ७३ लाख रुपैयाँ पुगेको छ।
समीक्षा अवधिमा कम्पनीको विद्युत बिक्री आम्दानी २ प्रतिशत बढेर ४३ करोड १५ लाख रुपैयाँ पुगेको छ। त्यस्तै, कम्पनीको खुद नाफा भने २६.०३ प्रतिशत बढेर २२ करोड ८७ लाख रुपैयाँ पुगेको छ।
समीक्षा अवधिमा कम्पनीको प्रतिसेयर आम्दानी ११ रुपैयाँ १८ पैसाबाट बढेर १३ रुपैयाँ ४२ पैसा पुगेको छ।
पुस मसान्तसम्ममा कम्पनीको प्रतिशेयर नेटवर्थ २०४ रुपैयाँ ६४ पैसा रहेको छ भने मूल्य आम्दानी अनुपात २४.७३ गुणा रहेको छ। कम्पनीको चुक्तापुँजी ३ अर्ब ४० करोड ९० लाख रुपैयाँ रहेको छ।
वि.सं.२०७९ माघ २५ बुधवार १०:५१ मा प्रकाशित
