काठमाडौं । आज अर्थात माघ २६ गते बिहीबार, तीन कम्पनीको लाभांश सुरक्षित गर्ने अन्तिम दिन रहेको छ। साधारण सभा तथा लाभांश वितरण प्रयोजनार्थ लुम्बिनी जनरल इन्स्योरेन्स र सगरमाथा इन्स्योरेन्सले भोली अर्थात माघ २७ गते बुकक्लोज गर्दैछ भने ज्योति विकास बैंकले माघ २९ गते अर्थात आइतबार बुकक्लोज गर्दैछ।
यस अनुसार आजसम्म नेप्सेमा कारोबार भइ कायम शेयरधनीहरुले यी कम्पनीहरुको साधारण सभामा सहभागिता जनाउन तथा यी कम्पनीहरुले वितरण गर्ने लाभांश प्राप्त गर्न सक्नेछन्।
लुम्बिनी जनरल इन्स्योरेन्सले आर्थिक वर्षको मुनाफाबाट ६.९९ प्रतिशत बोनस र कर प्रयोजनको लागि ०.३६७९ प्रतिशत नगद लाभांश वितरण गर्दैछ ।
सोही लाभांश पारित गर्न कम्पनीले फागुन ११ गते बिहीबार, बिहान १० बजे, अमृतभोग क्याटरिङ्ग, कालिकास्थान काठमाडौंमा १८ औं वार्षिक साधारण सभा बोलाएको छ।
सगरमाथा इन्स्योरेन्सले आर्थिक वर्षको मुनाफाबाट १२.४० प्रतिशतले बोनस र कर प्रयोजनको लागि ०.६५२६ प्रतिशतले नगद लाभांश वितरण गर्दैछ।
कम्पनीले फागुन ११ गते बिहीबार, बिहान १० बजे, लैनचौर बैंक्वेट, लैनचौर काठमाडौंमा २६ औं वार्षिक साधारण सभा बोलाएको छ।
त्यसैगरी, ज्योति विकास बैंकले हाल कायम चुक्ता पूँजीको ३ प्रतिशत बोनस शेयर र सोको कर प्रयोजनार्थ सहित ३.८० प्रतिशत नगद लाभांश वितरण गर्ने भएको छ ।
बैंकले फागुन १४ गते, त्रिभुवन आर्मी अफिसर्स क्लब भद्रकाली, काठमाडौंमा पन्ध्रौं वार्षिक साधारण सभा डाकेको छ।
वि.सं.२०७९ माघ २६ बिहीवार ०९:४३ मा प्रकाशित
