काठमाडौं । आइएमई जनरल र प्रुडेन्सियल इन्स्योरेन्स कम्पनीबीच चैत ५ गते मर्जर सम्बन्धी अन्तिम सम्झौतापत्रमा हस्ताक्षर भएको छ । दुवै कम्पनीको डिडिए सम्पन्न भई पूर्वनिर्धारित स्वाप रेसियो १ः१ मा आपसमा मर्जरमा जाने अन्तिम सम्झौता भएको हो ।
हिजो भएको दुबै कम्पनीबीचको सम्झौतापत्र हस्ताक्षर भएपछि दुवै कम्पनीले विशेष साधारणसभामार्फत उक्त अन्तिम सम्झौता पारित भई एकीकृत कारोबार गर्न थाल्नेछन् । त्यसको लागि करिब थप ४५ देखि ६० दिन लाग्नेछ ।
गत माघ २७ गते मर्जरमा जान प्रारम्भिक सम्झौता गरेका डिडिए सम्पन्न भएको छ । २७ गते मर्जर सम्झौता भएकोमा फागुन १२ गतेतिरबाट डिडिए सुरु गरिएको थियो ।
प्रारम्भिक सम्झौता गरेको ३८ दिनमा दुई बीमा कम्पनीले अन्तिम मर्जर सम्झौतामा हस्ताक्षर गरेको हो । सम्झौतामा नयाँ कम्पनीको सिईओमा आइएमई जनरल इन्स्योरेन्स कम्पनीका सिईओ युगेशभक्त वादे श्रेष्ठ हुनेछन् । त्यस्तै कम्पनीको अध्यक्षमा हेमराज ढकाल हुनेछन् । कम्पनीको नाम आइएमई प्रुडेन्सियल इन्स्योरेन्स राख्ने सहमति भएको छ ।
वि.सं.२०७९ चैत ६ सोमवार १०:२४ मा प्रकाशित
